یوم تکبیر آل پنجاب کبڈی ٹورنامنٹ فیصل آباد کبڈی کلب نے جیت لیا

ٹورنامنٹ ملک پور کبڈی سٹیڈیم میں منعقد ہوا، ساہیوال،لاہور،گجرات اور فیصل آباد کی ٹیموں نے حصہ لیا

ہفتہ 31 مئی 2025 11:50

فیصل آباد(اُردو پوائنٹ اخبارتازہ ترین - این این آئی۔ 31 مئی2025ء)ڈسٹرکٹ سپورٹس ڈیپارٹمنٹ کے زیر انتظام یوم تکبیر آل پنجاب کبڈی ٹورنامنٹ فیصل آباد کبڈی کلب نے جیت لیا۔ ٹورنامنٹ ملک پور کبڈی سٹیڈیم میں منعقد ہوا،جس میں پنجاب بھر سے ساہیوال،لاہور،گجرات اور فیصل آباد کی ٹیموں نے حصہ لیا۔ پہلا میچ ساہیوال اور لاہور کی ٹیموں کے درمیان کھیلا گیا۔

ساہیوال نے لاہور کو 37/23 سے ہرا کر فائنل کیلئے کوالیفائی کیا جبکہ دوسرے میچ میں فیصل آباد نے گجرات کو 42/29 سے ہرا کر فائنل کیلئے کوالیفائی کیا۔فائنل میچ میں فیصل آباد نے دلچسپ مقابلے کے بعد گجرات کو45/27 سے ہرا کر چیمپیئن کا اعزاز اپنے نام کیا۔

(جاری ہے)

ٹورنامنٹ کے مہمان خصوصی افتخار احمد چھچھڑ ایم پی اے و صدر پنجاب کبڈی ایسوسی ایشن، مسلم لیگی رہنماؤں میاں عرفان منان،راجہ دانیال احمد،فقیر حسین ڈوگر،صدر ڈسٹرکٹ کبڈی ایسوسی ایشن رانا علی عباس،صدر ڈویژنل کبڈی ایسوسی ایشن چوہدری عبد الوحید جٹ، سیکرٹری جنرل پنجاب کبڈی ایسوسی ایشن شہباز رندھاوا، سیکرٹری جنرل ڈویژنل ایسوسی ایشن رانا عمران احمد خاں، سیکرٹری جنرل ڈسٹرکٹ کبڈی ایسوسی ایشن ساجدہ لطیف نے فرسٹ پوزیشن حاصل کرنے پر فیصل آباد کی ٹیم کو دولاکھ کیش بمعہ ٹرافی، سیکنڈ پوزیشن حاصل کرنے پر ساہیوال کی ٹیم کو ڈیڑھ لاکھ کیش بمعہ ٹرافی تیسری پوزیشن حاصل کرنے پر گجرات کی ٹیم کو ایک لاکھ کیش بمعہ ٹرافی جبکہ چوتھی پوزیشن حاصل کرنے پر لاہور کی ٹیم کو ایک لاکھ کیش پرائز دیا۔