معاشرتی ترقی کا انحصار خواتین کی خودمختاری اور انہیں یکساں مواقع فراہم کرنے سے منسلک ہے ،مشیر ترقی ونسواں

کوئٹہ (اُردو پوائنٹ اخبارتازہ ترین - اے پی پی۔ 31 مئی2025ء) وزیر اعلیٰ بلوچستان کی مشیر برائے محکمہ ترقی نسواں ڈاکٹر ربابہ خان بلیدی نے کہا ہے کہ معاشرتی ترقی کا انحصار خواتین کی خودمختاری اور انہیں یکساں مواقع فراہم کرنے سے منسلک ہے اس لیے ان کی فلاح و بہبود کے لیے ہر سطح پر اقدامات ضروری ہیں۔ ان خیالات کا اظہار انہوں نے لیڈیز پردہ کلب کوئٹہ میں خواتین کے لیے منعقدہ نمائش کی افتتاحی تقریب کے موقع پر کیا۔

ڈاکٹر ربابہ خان بلیدی نے بطور مہمان خصوصی نمائش کا افتتاح کیا اور خواتین کی جانب سے لگائے گئے مختلف اسٹالز کا تفصیلی جائزہ لیا۔ تقریب سے خطاب کرتے ہوئے ڈاکٹر ربابہ خان بلیدی نے کہا کہ صوبائی حکومت بلوچستان کی خواتین کی صلاحیتوں کا اعتراف کرتے ہوئے ان کی خودمختاری اور باوقار مقام کے لیے پرعزم ہے۔

(جاری ہے)

یہ نمائش خواتین کو ایک ایسا پلیٹ فارم فراہم کرتی ہے جہاں وہ اپنی ہنر مندانہ صلاحیتیوں کو نہ صرف ظاہر کر سکتی ہیں بلکہ اسے معاشی ذریعہ بھی بنا سکتی ہیں۔

انہوں نے کہا کہ خواتین کی معاشی خودمختاری نہ صرف ان کے ذاتی استحکام کی ضامن ہے بلکہ پورے خاندان اور معاشرے کی خوشحالی کا باعث بھی بنتی ہے۔ اس ضمن میں خواتین کو ہنر مند بنانے، کاروبار شروع کرنے، اور معاشرتی میدان میں آگے بڑھنے کے لیے ہر ممکن سہولت فراہم کی جائے گی۔ انہوں نے کہاکہ محکمہ ترقی نسواں خواتین کے لیے تربیتی ورکشاپس، فنانسنگ اسکیمز، اور مارکیٹنگ کے مواقع فراہم کرنے جیسے منصوبوں پر کام کررہا ہے تاکہ خواتین کی مصنوعات کو وسیع پیمانے پر فروغ دیا جا سکے۔

یہ ایک طویل المدتی حکمت عملی کا حصہ ہے جس کا مقصد بلوچستان میں خواتین کو پائیدار معاشی مواقع فراہم کرنا ہے۔ ڈاکٹر ربابہ خان بلیدی نے خواتین کی ترقی اور خودمختاری کے لئے لیڈیز پردہ کلب کوئٹہ کی کاوشوں کو سراہتے ہوئے کہا کہ یہ تاریخی ادارہ خواتین کی اجتماعی ترقی، ہنر مندی کیفروغ اور معاشی خود انحصاری کے حوالے سے قابلِ ستائش خدمات سر انجام دے رہا ہے جس سے خواتین کو اپنے خوابوں کو حقیقت میں بدلنے میں مدد مل رہی ہے۔

نمائش میں مختلف قسم کے دستکاری کے سامان، کپڑوں کی مصنوعات، جیولری، فوڈ آئٹمز، اور دیگر گھریلو اور تخلیقی مصنوعات کے اسٹالز لگائے گئے تھے جن میں بلوچستان کی خواتین نے اپنی مہارت اور تخلیقی صلاحیتوں کا عملی مظاہرہ کیا۔ اس نمائش میں نہ صرف خواتین کاروباری شخصیات بلکہ طالبات اور خواتین ہنر مندوں کی بھی بڑی تعداد نے حصہ لیا، جو اس بات کا مظہر ہے کہ بلوچستان کی خواتین معاشرتی اور معاشی ترقی میں بھرپور حصہ لینے کے لیے تیار ہیں۔