صوبائی وزیر آفتاب عالم کا دریائے سندھ میں کشتی کے حادثہ میں لاپتہ افراد کی تلاش کیلئے جاری ریسکیو آپریشن کا جائزہ لینے کیلئے دورہ

اتوار 1 جون 2025 15:50

پشاور (اُردو پوائنٹ اخبارتازہ ترین - اے پی پی۔ 01 جون2025ء) کوہاٹ میں علاقہ خوشحال گڑھ کے نزدیک دریائے سندھ میں کشتی کے حادثہ میں لاپتہ افراد کی تلاش کیلئے ضلعی انتظامیہ کوہاٹ کی زیر نگرانی ریسکیو آپریشن جاری ہے۔ خیبر پختونخوا کے وزیر قانون آفتاب عالم ایڈوکیٹ ریسکیو آپریشن کا جائزہ لینے کیلئے چیئرمین تحصیل گمبٹ ساجد اقبال اور پارٹی رہنما اشتیاق قریشی کے ہمراہ جائے حادثہ پر چوتھے روز بھی موجود رہے. صوبائی وزیر روز اول سے آپریشن کی نگرانی کررہے ہیں۔

(جاری ہے)

اس موقع پر ضلعی انتظامیہ کوہاٹ اور ریسکیو حکام نے صوبائی وزیر قانون کو بتایا کہ آپریشن میں 1122 کی 4 ٹیمیں، پاک فوج کی ایس ایس جی کی ایک ٹیم اور تربیلا ڈیم سے خصوصی غوطہ خوروں کی ٹیم مشترکہ ریسکیو آپریشن میں حصہ لے رہے ہیں۔ چوتھے روز بھی آپریشن صبح 6 بجے تا شام 6 بجے جاری رہا لیکن تاحال نتیجہ خیز ثابت نہ ہو سکا۔ریسکیو ٹیموں اور لواحقین نے مزید 2 کشتیوں کی فراہمی کا مطالبہ کیا. صوبائی وزیر نے ریسکیو آپریشن کو کامیاب بنانے کیلئے ہر ممکن تعاون کی یقین دہانی کرائی۔