راولپنڈی پولیس کی جانب سے شہر میں موجود گرجا گھروں کی سکیورٹی کو یقینی بنانے کے لیے موثر اور جامع انتظامات

اتوار 1 جون 2025 16:50

راولپنڈی (اُردو پوائنٹ اخبارتازہ ترین - اے پی پی۔ 01 جون2025ء) راولپنڈی پولیس کی جانب سے شہر میں موجود گرجا گھروں کی سکیورٹی کو یقینی بنانے کے لیے موثر اور جامع انتظامات کیے گئے ہیں۔ ترجمان پولیس کے مطابق 400 سے زائد افسران و جوان سکیورٹی کے فرائض انجام دے رہے ہیں تاکہ کسی بھی ناخوشگوار واقعے سے بچا جا سکے۔

(جاری ہے)

سینئر افسران موقع پر موجود اہلکاروں کو بریفنگ دے رہے ہیں اور ان کی ڈیوٹی کو چیک بھی کر رہے ہیں تاکہ تمام سکیورٹی امور کو موثر انداز میں انجام دیا جا سکے۔

تھانوں کی موبائل گاڑیاں، ایلیٹ فورس اور ڈولفن فورس کی خصوصی ٹیمیں علاقے میں مسلسل گشت کر رہی ہیں۔ سی پی او سید خالد ہمدانی نے اس موقع پر کہا کہ شہریوں کی جان و مال کا تحفظ پولیس کی اولین ترجیح ہے اور اس مقصد کے لیے تمام دستیاب وسائل کو بروئے کار لایا جا رہا ہے۔ انہوں نے مزید کہا کہ راولپنڈی پولیس ہر ممکن کوشش کر رہی ہے کہ شہر میں امن و امان کی فضا برقرار رکھی جائے۔