پروفیسر اکرام الدین اجن کا ایل یو ایچ حیدرآباد میں جدید ٹراما یونٹ کے قیام کے سلسلے میں وارڈوں اور مختلف شعبوں کا دورہ

تین جدید اور مکمل طور پر لیس آپریٹنگ تھیٹرز قائم کیے جائیں، دس بستروں پرایچ ڈی یوجدید طبی آلات سے آراستہ کیا جائے،وائس چانسلرلیاقت یونیورسٹی

اتوار 1 جون 2025 20:45

حیدرآباد(اُردو پوائنٹ اخبارتازہ ترین - این این آئی۔ 01 جون2025ء)لیاقت یونیورسٹی آف میڈیکل اینڈ ہیلتھ سائنسز (لمس)جام شورو کے وائس چانسلر پروفیسر اکرام الدین اجن اور ایم ایس لیاقت یونیورسٹی ہسپتال حیدرآباد و جام شورو ڈاکٹر علی اکبر ڈاہری نے لیاقت یونیورسٹی ہسپتال(ایل یو ایچ)حیدرآباد میں جدید ٹراما یونٹ کے قیام کے سلسلے میں سول ہسپتال حیدرآباد کے وارڈوں اور مختلف شعبوں کا دورہ کیا، اس موقع پر پروفیسر سرجن ڈاکٹر ارشد حسین ابڑو، پروفیسر ڈاکٹر اکرم باجوہ، اے ایم ایس جنرل ڈاکٹر پونم جتوئی، سرجن ڈاکٹر الماس قاضی، ہیڈ آف حادثات و ایمرجنسی ڈپارٹمنٹ ڈاکٹر محمود سومرو، آر ایم او سیکورٹی ڈاکٹر سعد عباسی و دیگر انتظامی افسران بھی موجود تھے۔

وائس چانسلر اکرام الدین اجن نے ہدایات جاری کیں کہ تین جدید اور مکمل طور پر لیس آپریٹنگ تھیٹرز قائم کیے جائیں، دس بستروں پر مشتمل ہائی ڈیپنڈینسی یونٹ(ایچ ڈی یو)جدید طبی آلات سے آراستہ کیا جائے۔

(جاری ہے)

انہوں نے کہا کہ ہنگامی طبی خدمات کے لئے مناسب تربیت یافتہ اور ماہر عملہ تعینات کیا جائے تاکہ چوبیس گھنٹے بیک وقت اعلی معیار کی دیکھ بھال فراہم کی جا سکے، انہوں نے کہا کہ ہم نے حال ہی میں انگلینڈ سے ایک ماہر سرجن ڈاکٹر الماس قاضی جنہیں FRCS(Fellowship of the Royal College of Surgeons)کی سند حاصل ہے کو لیاقت یونیورسٹی ہسپتال میں تعینات کیا ہے تاکہ مریضوں کو بہترین طبی خدمات فراہم کی جا سکیں، یہ ماہر سرجن نہ صرف اس نئے ٹراما یونٹ میں اپنی خدمات فراہم کریں گے بلکہ وہاں تربیتی پروگرامز کا بھی انعقاد کریں گے تاکہ ہسپتال کے عملے کی مہارت میں اضافہ ہو، یہ نیا ٹراما یونٹ ایمرجنسی ڈیپارٹمنٹ کے بالکل قریب قائم کیا جائے گا، تاکہ مریضوں تک فوری رسائی ممکن ہو اور ماہرین کی بروقت مداخلت کے ذریعے جان بچانے والی کارروائیوں میں تاخیر سے بچا جا سکے۔

اس اقدام سے شدید زخمی مریضوں کی صحت یابی میں نمایاں بہتری متوقع ہے۔وائس چانسلر اکرام الدین اجن نے کہا کہ ہمارا مقصد ایک ایسا جدید ٹراما یونٹ قائم کرنا ہے جو بین الاقوامی معیار پر پورا اترے اور زخمیوں کے لیے بہتر اور فوری طبی امداد فراہم کرے۔ وائس چانسلر نے گیسٹرو انٹرولوجی یونٹ کا بھی تفصیلی دورہ کیا اور وہاں کی سہولتوں اور خدمات کو مزید بہتر بنانے کیلئے ضروری ہدایات جاری کیں، یہ تمام اقدامات لمس کی صحت عامہ کے شعبے میں جدت، معیار اور بہترین خدمات فراہم کرنے کے عزم کی عکاسی کرتے ہیں۔