سمڑیال کے عوام نے بانی پی ٹی آئی کے ریاست مخالف بیانیے کو مسترد کردیا‘‘عظمیٰ بخاری

بدھ 4 جون 2025 21:38

لاہور (اُردو پوائنٹ اخبارتازہ ترین - این این آئی۔ 04 جون2025ء) وزیر اطلاعات پنجاب عظمیٰ بخاری نے کہا ہے کہ سمڑیال کے عوام نے بانی پی ٹی آئی کے ریاست مخالف بیانیے کو مسترد کردیا،39ہزار ووٹوں کی لیڈ سے شکست کے بعد دھاندلی کا الزام لگاناشرمناک ہے،سمڑیال الیکشن میں تحریک انصاف کو ذلت آمیز شکست کا سامنا کرنا پڑا۔انہوں نے پی ٹی آئی کے وقاص اکرم کی پریس کانفرنس پر ردعمل کا اظہار کرتے ہوئے کہا کہ فافن کی رپورٹ میں کہا گیا پریزائیڈنگ افسران نے پولنگ ایجنٹس کو فارم 45فراہم کیے گئے،فافن نے 121پولنگ ایجنٹس کے انٹرویو کیے ان میں 116پولنگ ایجنٹس نے ووٹنگ کے عمل پر اطمینان کا اظہار کیا۔

عظمیٰ بخاری نے کہا کہ سمڑیال میں مسلم لیگ(ن) کا ووٹ 41فیصد سے بڑھ کر 59فیصد ہوا ہے،فافن نے کہا سمڑیال میں تحریک انصاف ووٹ 35فیصد سے 29فیصد تک آگیا،یہ رپورٹ تحریک انصاف اور اسکے ایجنڈے پر چلنے والے نام نہاد اور جید فلسفیوں اور دانشوروں کے ڈوب مرنے کیلئے کافی ہے، شکست تسلیم کرنے کی بجائے پولیس اور ضلعی انتظامیہ پر الزامات لگانا پی ٹی آئی کا پرانا وطیرہ ہے۔

(جاری ہے)

انہوں نے کہا کہ سمڑیال کے عوام نے بانی پی ٹی آئی کے ریاست مخالف بیانیے کو مسترد کردیا،پنجاب اب مریم نواز کی خدمت کی سیاست کو ووٹ دیتا اور سپورٹ کرتا ہے،یہ نشست ہمیشہ مسلم لیگ کی رہی اور ناقابل شکست رہی ہے۔