Live Updates

وفاقی وزیر تجارت جام کمال خان سے چیئرمین پاکستان فارماسیوٹیکل مینوفیکچرنگ ایسوسی ایشن توقیر الحق کی ملاقات

بدھ 4 جون 2025 21:37

اسلام آباد (اُردو پوائنٹ اخبارتازہ ترین - اے پی پی۔ 04 جون2025ء) وفاقی وزیر تجارت جام کمال خان نے کہا ہے کہ دواسازی کی برآمدات کو فروغ دینے کے لئے ٹریڈ ڈویلپمنٹ اتھارٹی کے زیر انتظام “فارم ایکس پاکستان” کے نام سے ایک بااختیار کونسل قائم کی جا رہی ہے، کونسل کے قیام سے اس شعبے کی برآمدات 700 ملین امریکی ڈالر سے بڑھ کر 3 ارب امریکی ڈالر تک پہنچ سکتی ہیں ۔

ان خیالات کا اظہار انہوں نے بدھ کو اپنے دفتر میں پاکستان فارماسیوٹیکل مینوفیکچرنگ ایسوسی ایشن کے چیئرمین توقیر الحق سے ملاقات میں کیا۔ وزیر تجارت نے ایسوسی ایشن کے وفد سے کہا کہ دواسازی کا شعبہ بے پناہ برآمدی صلاحیت رکھتا ہے اور فارم ایکس پاکستان اب صرف دو قدم کی دوری پر ہے، اسے مکمل طور پر جلد فعال کر دیا جائے گا۔

(جاری ہے)

وزیر تجارت جام کمال نے کہا کہ ہر گزرتے دن کے ساتھ ہمارے تعلقات افغانستان اور دیگر پڑوسی ممالک کے ساتھ مزید مضبوط اور مربوط ہو رہے ہیں جس کے نتیجے میں دواسازی کی برآمدات میں بھی اضافہ ہوگا۔

پاکستان فارماسیوٹیکل مینوفیکچرنگ ایسوسی ایشن کے چیئرمین توقیر الحق نے کہا کہ وزیر تجارت کی اس موثر حکمت عملی سے صنعت کو بڑے مالی نقصانات سے بچنے میں مدد ملے گی۔ انہوں نے کہا کہ اس اقدام سے اس شعبے میں ترقی کی نئی راہیں ہموار ہوں گی ۔توقیر الحق نے افغانستان کو ایک اہم منڈی قرار دیتے ہوئے وہاں دوا سازی کی برآمدات میں مزید سہولیات دینے پر زور دیا اور اس ضمن میں وزیر تجارت کی پالیسی تعاون کی یقین دہانی کا خیر مقدم کیا۔

وفاقی وزیر نے ایسوسی ایشن کو یقین دہانی کرائی کہ وزارت تجارت دوا سازی کے برآمدکنندگان کو درپیش مسائل کے حل کے لئے پرعزم ہے۔ انہوں نے کہا کہ وزارت میں ایک خصوصی ’’ایکسپورٹر فسیلیٹیشن ڈیسک‘‘ قائم کیا جا رہا ہے تاکہ صنعت کو ایسے اہم معاملات میں فوری حکومتی مدد فراہم کی جا سکے جن میں فوری مداخلت کی ضرورت ہو۔