جنگلی پرندوں کی غیرقانونی خرید وفروخت میں ملوث 5ملزمان کا چالان، چڑ ی فروشوں کیخلاف مقدمہ درج ، پاڑہ ہرن کے 2شکاریوں کو سوا لاکھ روپے جرمانہ عائد

پیر 2 جون 2025 16:58

لاہور (اُردو پوائنٹ اخبارتازہ ترین - اے پی پی۔ 02 جون2025ء) سینئروزیر مریم اورنگزیب اور سیکرٹری جنگلات ،جنگلی حیات و ماہی پر وری پنجاب مدثر ریاض ملک کی ہدایت پر چیف وائلڈلائف رینجرمبین الٰہی کی زیر قیادت محکمہ جنگلی پرندگان کی ناجائز خرید وفروخت اور قبضہ کرنیوالوں کے خلاف صوبہ بھر میں موثر کارروائیاں کررہا ہے ،جس کے نتیجے میں صوبہ کے مختلف اضلاع سے جنگلی چڑیوں کی فروخت کرنیوالے اور ناجائز قبضہ تیتر کرنیوالے 5ملزمان کا وائلڈلا ئف ایکٹ کی خلاف ورزی پر چالان مرتب کرکے قانونی کارروائی کا آغاز کردیاگیا جبکہ 3چڑی فروشوں کیخلاف مقامی تھانہ میں ایف آئی آر درج کروا دی گئی ۔

گزشتہ دنوں پاڑہ ہرن کے شکار میں ملوث پائے گئے 4میں سے 2شکاریوں کو عدالت نے مجموعی طور پر ایک لاکھ 20ہزار روپے جرمانہ کیا ۔

(جاری ہے)

ملزمان کے غیرقانونی قبضہ سے برآمدہ 80جنگلی چڑیاں بھی سرکاری تحویل میں لے لی گئی۔ ترجمان کے مطابق ڈپٹی چیف وائلڈلائف رینجر راولپنڈی ریجن راجہ محمد احسان کی سربراہی میں اسسٹنٹ چیف وائلڈلائف رینجر ضلع راولپنڈی رضوانہ عزیز نے اپنی ٹیم کے ہمراہ شہر کے مختلف سپاٹس پر چھاپوں کے دوران 2چڑی فروشوں کو گرفتار کرلیا جبکہ ایک چڑی فروش تاحال گرفتار نہیں ہوسکا ۔

چڑی فروشوں کیخلاف مقامی تھانہ میں ایف آئی آر درج کروادی گئی ہے اور ملزم کی تلاش جاری ہے ۔ایسی ہی ایک کارروائی میں ڈپٹی چیف وائلڈلائف رینجر ڈی جی خان ریجن سخی محمد جوئیہ کی سربراہی میں اسسٹنٹ چیف وائلڈلائف رینجر ڈی جی خان سدر ہ المنتہی نے اپنی ٹیم کے ہمراہ تیتر کے غیرقانونی قبضہ کی پاداش میں 2ملزمان کا وائلڈلائف ایکٹ کی خلاف ورزی پر چالان کرکے مبلغ 30ہزار روپے جرمانہ کرکے کیس نمٹادیا ۔