Live Updates

عیدالاضحیٰ پر ملک میں 4 چھٹیوں کا نوٹی فکیشن جاری

وزیراعظم کی طرف سے سرکاری تعطیلات کی منظوری کے بعد نوٹی فکیشن جاری کیا گیا

ساجد علی پیر 2 جون 2025 17:10

عیدالاضحیٰ پر ملک میں 4 چھٹیوں کا نوٹی فکیشن جاری

اسلام آباد ( اُردو پوائنٹ اخبارتازہ ترین۔ 02 جون 2025ء ) عیدالاضحیٰ پر چھٹیوں کا نوٹی فکیشن جاری کردیا گیا۔ تفصیلات کے مطابق وفاقی حکومت کی جانب سے ملک میں عیدالاضحیٰ کی تعطیلات کے حوالے سے نوٹی فکیشن جاری کردیا گی، اس بار عید پر 4 چھٹیوں کا نوٹی فکیشن جاری کردیا گیا ہے، رواں سال عید الاضحٰی پر ہفتہ وار تعطیلات کے علاوہ صرف ایک اضافی تعطیل دیئے جانے کا امکان ظاہر کیا جا رہا تھا، تاہم وفاقی حکومت نے کل 4 چھٹیاں دینے کا فیصلہ کیا، وزیراعظم کی طرف سے عید الاضحی پر 4 سرکاری چھٹیوں کی منظوری کے بعد نوٹی فکیشن جاری کیا گیا جس کے تحت 6 جون بروز جمعہ سے 9 جون بروز پیر تک ملک میں عیدالاضحیٰ کی تعطیلات ہوں گی۔

علاوہ ازیں سعودی عرب نے بھی عید الاضحٰی کی عام تعطیلات کا اعلان کردیا ہے، مملکت میں عید الاضحیٰ کی تعطیلات کا آغاز 5 جون بروز جمعرات سے ہوگا اور اتوار 8 جون کو آخری چھٹی ہوگی، اتوار تک عید کی چھٹیوں سے لطف اندوز ہونے کے بعد سعودیہ میں پیر 9 جون سے لوگ ملازمتوں پر لوٹ آئیں گے، سعودی وزارت محنت اور افرادی قوت کی جانب سے جاری بیان میں امید ظاہر کی گئی یہ چھٹیاں شہریوں کو عبادات، فریضہ قربانی اور ثقافتی ذمہ داریوں کو نبھانے میں مددگار ثابت ہوگی۔

(جاری ہے)

اسی طرح متحدہ عرب امارات نے بھی ملازمین کے لیے عید الاضحی کی تعطیلات کا اعلان کردیا ہے، امارات میں ملازمین کو اس سال عید الاضحیٰ کے لیے چار دن کا ویک اینڈ ملے گا، فیڈرل اتھارٹی آف ہیومن ریسورس کی جانب سے جاری کردہ ایک بیان میں اتھارٹی نے کہا کہ عیدالاضحیٰ کے موقع پر 9 ذی الحج سے 12 ذی الحج تک چھٹیاں ہوں گی، اس کا مطلب ہے ملازمین جمعرات 5 جون سے اتوار 8 جون تک چھٹیوں پر رہیں گے، ملازمین کے لیے پیر 9 جون کو دوبارہ کام شروع ہو جائے گا۔