دنیا کو بتائیں گے سندھ طاس معاہدہ حل نہ ہوا تو چند سال بعد پھر جنگ کا خدشہ ہے

بھارت کہتا کہ جب بھی دہشتگردی ہوگی بغیر ثبوت حملہ کردیں گے، ہندوستان کا رویہ غیرذمہ دارانہ ہے، بھارت کو اگر سپرپاور بھی بننا ہے تو عالمی قوانین پر عمل بھی کرنا ہوگا۔ سابق وفاقی وزیر خرم دستگیر

ثنااللہ ناگرہ منگل 3 جون 2025 22:46

دنیا کو بتائیں گے سندھ طاس معاہدہ حل نہ ہوا تو چند سال بعد پھر جنگ کا ..

اسلام آباد ( اردوپوائنٹ اخبار تازہ ترین۔ آئی پی اے ۔ 03 جون 2025ء ) سابق وفاقی وزیر خرم دستگیر نے کہا ہے کہ دنیا کو بتائیں گے سندھ طاس معاہدہ حل نہ ہوا تو چند سال بعد پھر جنگ کا خدشہ ہے، بھارت کہتا کہ جب بھی دہشتگردی ہوگی بغیر ثبوت حملہ کردیں گے، ہندوستان کا رویہ غیرذمہ دارانہ ہے۔ انہوں نے جیونیوز کے پروگرام میں گفتگو کرتے ہوئے کہا کہ بھارت مسئلہ کشمیر کی قراردادوں سے اتنا خائف ہے کہ ان کے سفارتکار اقوام متحدہ کے قریب بھی نہیں گئے۔

لیکن ہم نے کل اپنے قریبی دوست ملک چین کے مندوب سے ملاقات کا آغاز کیا روس کے مندوب سے ملاقات کی، اسلامی ممالک کے سفراء ، امریکی حکام سے ملاقاتیں کیں، سب نے اس بات کو بہت سراہا، کہ ہندوستان کا مشن چند لوگوں سے ملاقاتیں کرکے چلا گیا لیکن پاکستان نے امن قائم کرنے کی بات کی ہے۔

(جاری ہے)

امن کی بات پاکستان سے ہوئی جب کہ بھارت جنگی جنون کا مظاہرہ کررہا ہے، ہم نے آبی جارحیت پر بات کی۔

پاکستان نے جنگ کے دوران اور بعد میں شور نہیں ڈالا بلکہ ہمیشہ امن کی بات کی۔ دنیا نے اس بات کو بڑا سراہا ہے۔پاکستان نے جنگ کے بعد بھی امن کی بات کی۔ پہلگام واقعے پر فی الحال کسی نے نہیں پوچھا، پہلگام کسی ریکارڈ پر نہیں ہے، ہندوستان پہلگام واقعے پر پاکستان پر الزام ثابت نہیں کرسکا۔ اس لئے اس کا لفظ بھی نہیں لیا گیا۔ امریکا کی طرف سے بات ہوئی کہ پرانی دہشتگردتنظیموں کا معاملہ ختم کیا جائے، جس پر ہم نے کہا کہ اگر کوئی ثبوت ہے تو دیں ہم ایکشن لیں گے، ہم نے دنیا کو بتایا کہ یہ وہ پاکستان نہیں جس کو ہندوستان دنیا کے سامنے رکھنا چاہتا ہے اور ہندوستان بھی وہ نہیں جو سیکولر ریاست تھی، ہندوتوا پورے خطے کو جنگ میں جھونکنے جارہی ہے۔

کل سے ہم واشنگٹن میں سفارتکاری کا آغاز کریں گے، صدر ٹرمپ کو یادہانی کرائیں گے جو انہوں نے ثالثی کے کردار کی بات کی۔ہمارا ایک سفارتی مشن ہے، یہ ایک سفارتی وفد ہے،آئندہ پارلیمانی وفود میں اپوزیشن کی بھی نمائندگی ہوگی۔دنیا کو بتائیں گے سندھ طاس معاہدہ حل نہ ہوا تو چند سال بعد پھر جنگ میں جائیں گے، دنیا کو یہ بھی بتائیں گے کہ بھارت کہتا کہ ہمیں جنگ کرنے کیلئے کوئی ثبوت نہیں چاہیئے جب بھی دہشتگردی ہوگی ہم حملہ کردیں گے، بھارت اگر سپرپاور بننا چاہتا تواس کو عالمی قوانین پر عمل کرنا ہوگا، دونوں ایٹمی ملک ہیں لیکن ہندوستان غیرذمہ داری کا مظاہرہ کررہا ہے۔

خرم دستگیر نے کہا کہ بھارت کو اگر سپرپاور بننا ہے تو عالمی قوانین اور طریقہ کار پر عمل بھی کرنا ہوگا، بھارت کے جنگی جنون کے خاتمے کیلئے عالمی تعاون درکار ہے۔