مودی جہاں سندور بھیجیں گے، وہ چپل سے منہ لال کردیں گے، بھارتی خواتین کا سخت ردعمل

مودی کو شرم آنی چاہیے کہ وہ بیواؤں کو سندور دینے کی بات کر رہا ہے، بھارتی خواتین نے آڑے ہاتھوں لے لیا

پیر 2 جون 2025 19:18

نئی دہلی (اُردو پوائنٹ اخبارتازہ ترین - آن لائن۔ 02 جون2025ء) بھارتی خواتین نے مودی کی سندور سیاست پر سخت ردعمل کا اظہار کرتے ہوئے کہا ہے کہ جہاں مودی سندور بھیجیں گے، وہاں سے ان کا منہ چپل سے لال کردیا جائے گا۔ہندو انتہا پسند سیاسی جماعت بی جے پی کے کٹھ پتلی بھارتی وزیراعظم نریندر مودی کی سندور سیاست کو ہندو خواتین نے مذہبی جذبات پرسیاست کرنے کی مذموم کوشش قرار دے دیا ہے۔

مودی سرکار کی ہندو خواتین کے مذہبی جذبات سے کھیلنے کی شرمناک کوشش عوام نے مسترد کردی ہے۔ بھارتی شہریوں کا کہنا ہے کہ پہلگام حملے کے بعد عوامی غصے سے بچنے کے لیے مودی نے آپریشن سندور کا ڈراما رچایا ہے اور مودی سرکار نے متاثرین کے اہلخانہ سے تعزیت کرنے کے بجائے گھر گھر سندور بھیجنے کا سیاسی کھیل شروع کیا ہے۔

(جاری ہے)

مودی کا بھیجا ہوا سندور بھارتی خواتین نے مسترد کرتے ہوئے کہا کہ ’’سندور بِکتا نہیں اور نہ ہی بانٹا جاتا ہے‘‘۔

عوام نے سوال کیا ہے کہ آپریشن سندور کے بعد ہر طرف مودی کی مسکراتی تصویر ہے، فوج کی تصویر کیوں نہیں، کیا مودی مرنے والوں پر مسکرارہا ہے ۔بھارتی خاتون نے کہا کہ جن کے گھر تم سندور بھیجو گے وہ چپل سے منہ لال کردیں گی۔ مودی کو ان 28 بیواؤں کے گھر جاکر ان کے سر پر ہاتھ رکھنا چاہیے تھا، لیکن یہ تو انہی کو سندور بھیجنے لگے۔ کرنل صوفیہ جن کے پورے خاندان پر مودی کو پھول برسانے چاہییں، انہیں زبردستی بلایا جارہا ہے کہ مودی کے روڈ شو پر پھول برساؤ۔

بھارتی خاتون نے کہا کہ مودی سرکار نے ہلاکتوں پر ہمدردی کے بجائے سیاسی سرکس لگا دیا ہے۔ سندور کسی مرد کی ملکیت کا نشان ہے، مذاق نہیں۔ مودی نے ہمارے رشتوں، رسموں اور دھرم کا مذاق بنا دیا ہے۔ مودی کو شرم آنی چاہیے، وہ بیواؤں کو سندور دینے کی بات کر رہا ہے۔بھارتی وزیراعظم مودی نے ثابت کردیا ہے کہ اسے نہ مذہب کی سمجھ ہے، نہ رواج کی، نہ ہی انسانی احساسات کی، بلکہ اسے اپنی سیاست اور سیاسی مفادات سے غرض ہے۔