جنرل انیل چوہان کا اعتراف بھارتی دفاعی حکمت عملی کی ناکامی قرار

بھارتی تجزیہ نگاروں نے بھارتی فضائیہ کے نقصان کو چھپانے پر تشویش کا اظہار کیا، بھارتی میڈیا بھی سی ڈی ایس پر برس پڑا اور آپریشن سندور کی حقیقت سامنے آنے پر ہلچل مچی ہوئی ہے؛ رپورٹ

ساجد علی منگل 3 جون 2025 13:22

جنرل انیل چوہان کا اعتراف بھارتی دفاعی حکمت عملی کی ناکامی قرار

نئی دہلی ( اُردو پوائنٹ اخبارتازہ ترین۔ 03 جون 2025ء ) بھارتی چیف آف ڈیفنس اسٹاف (سی ڈی ایس) جنرل انیل چوہان کے اعتراف کو بھارتی دفاعی حکمت عملی کی ناکامی قرار دے دیا گیا۔ تفصیلات کے مطابق جنرل چوہان نے آپریشن سندور کے دوران لڑاکا طیاروں کے نقصانات کا اعتراف کیا جس پر بھارتی تجزیہ نگاروں اور میڈیا کی جانب سے شدید تنقید کا سامنا ہے کیوں کہ جنرل انیل چوہان کے حالیہ اعتراف نے بھارتی دفاعی حکمت عملی کی ناکامی کو آشکار کرتے ہوئے مودی سرکار کے جھوٹ کو بھی بے نقاب کردیا۔

بتایا گیا ہے کہ بھارتی تجزیہ نگاروں نے سی ڈی ایس انیل چوہان پر شدید تنقید کرتے ہوئے بھارتی فضائیہ کے نقصان کو چھپانے پر تشویش کا اظہار کیا، اس کے علاوہ بھارتی میڈیا بھی سی ڈی ایس پر برس پڑا اور آپریشن سندور کی حقیقت سامنے آنے پر ہلچل مچی ہوئی ہے کیوں کہ سی ڈی ایس کے متضاد بیانات نے نئے سوال کھڑے کر دیئے ہیں۔

(جاری ہے)

بھارتی تجزیہ نگاروں کا کہنا ہے کہ حیران کن بات یہ ہے کہ سی ڈی ایس نے اعتراف کیا کہ "ہمارے ایک سے زائد جہاز گرائے گئے"، بھارتی فوج کے افسران کی جانب سے بار بار مخصوص زبان کا استعمال شکوک پیدا کر رہا ہے، پاک بھارت کشیدگی کے دوران مودی سرکار کی جانب سے جو ہوا اور جو کہا جا رہا ہے ان دونوں میں واضح فرق محسوس ہو رہا ہے، سی ڈی ایس انیل چوہان نے وہی بات کہی جو دنیا سات اور آٹھ مئی کو جان چکی تھی۔

بھارتی تجزیہ نگاروں نے سوال اٹھایا کہ جب حقیقت سب کو معلوم تھی، تو بھارت اس پر پردہ ڈالنے کی کوشش کیوں کر رہا تھا؟ انیل چوہان نے ایک اہم نکتہ اٹھایا کہ بھارتی جہازوں کا گرنا مسئلہ نہیں ہے بلکہ گرنے کی وجہ تلاش کی جانی چاہیئے، اس پر بھارتی تجزیہ نگاروں نے سی ڈی ایس کا سچ بولنا قابلِ تحسین قرار دیا مگر ان کا کہنا ہے کہ سرکار سے سوال اب بھی باقی ہیں، ڈی جی ایم اوز کی پریس کانفرنس میں تسلی بخش جواب نہ دینا ہی نقصانات کا اشارہ دے رہا تھا۔

اسی طرح ڈی جی ایئر کا نقصانات کے سوال پر یہ کہنا کہ "ہم ابھی بھی حالت جنگ میں ہیں" بھی بھارتی فضائیہ کے نقصانات کا عندیہ تھا، سی ڈی ایس کی جانب سے پاکستان کی جوابی کارروائی میں حتمی تعداد بتائے بغیر بھارتی جیٹ گرنے کا اعتراف بہت سے سوالات کو جنم دے رہا ہے، بین الاقوامی اخباروں میں چھپ رہی خبروں کے بیچ انٹرویو میں سی ڈی ایس کا اعتراف یہ سوال بھی پیدا کرتا ہے کہ مودی سرکار ہم سے کیا چھپا رہی ہے؟۔