سندھ حکومت کا کراچی میں سمر کیمپس اور شہید بینظیر آباد میں 6 ڈویژنوں پر مشتمل دو روزہ وومین والی بال چیمپئن شپ 2025 کرانے کا اعلان

کراچی (اُردو پوائنٹ اخبارتازہ ترین - این این آئی۔ 03 جون2025ء) سندھ حکومت نے کھیلوں کی سرگرمیوں کو فروغ دینے کے لیے دو بڑے ایونٹس کا اعلان کیا ہے۔ ان میں کراچی کے یوتھ کلبز میں 40 روزہ سمر کیمپس اور شہید بینظیر آباد میں 6 ڈویژنوں پر مشتمل آل سندھ انٹر ڈویژن وومین والی بال چیمپئن شپ 2025 شامل ہیں، ترجمان کے مطابق، سمر کیمپ 2025 کا باضابطہ آغاز 15 جون 2025 کو سندھ یوتھ کلب گلستان جوہر اور سندھ اسپورٹس کلب ناظم آباد میں ہوگا. سیکریٹری کھیل و امور نوجوانان، عبدالعلیم لاشاری نے بتایا کہ یہ سمر کیمپس15 جون سے شروع ہوکر 25 جولائی تک جاری رہے گا، جس میں نوجوان کھلاڑیوں کو مختلف کھیلوں کی تربیت دی جائے گی۔

ان کیمپس کا مقصد نوجوانوں کو اپنی صلاحیتیں نکھارنے اور انہیں صحت مند سرگرمیوں کی جانب راغب کرنے کا بھرپور موقع فراہم کرنا ہے۔

(جاری ہے)

عبدالعلیم لاشاری کا کہنا تھا کہ سمرکیمپ 2025 میں نوجوانوں کو بیڈ منٹن،فینسنگ،اسکواش، فٹسال، شطرنج،باکسنگ، تائیکوانڈو، آرچری، جمناسٹک، اسکیٹنگ، تھرو بال، چیز، شوٹوکان، ٹیبل ٹینس اور دیگر کھیلوں کی تربیت دی جائے گی. ڈسٹرکٹ اسپورٹس افسر شہید بینظیر آباد عبدالرحیم راجپوت نے بریفنگ میں بتایا کہ شہید بینظیر آباد میں آل سندھ انٹر ڈویژن وومین والی بال چیمپئن شپ 18 جون 2025 کو شروع ہوگی اور 19 جون 2025 تک جاری رہے گی۔

اس چیمپئن شپ میں صوبے کے 6 بڑے ڈویژنوں کی ٹیمیں حصہ لیں گی، جن میں نوابشاہ، حیدرآباد، کراچی، سکھر، میرپورخاص اور لاڑکانہ ڈویژن شامل ہیں۔ عبدالعلیم لاشاری نے واضح کیا کہ اس چیمپئن شپ میں شرکت کرنے والی 6 ڈویژنوں کی 80 کھلاڑیوں کو کٹس، رہائش، ڈیلی الانس اور دیگر ضروری سہولیات فراہم کی جائیں گی. انہوں نے مزید کہا کہ اس چیمپئن شپ سے صوبے میں خواتین کھلاڑیوں کی حوصلہ افزائی ہوگی اور انہیں ایک بڑا پلیٹ فارم ملے گا تاکہ وہ اپنی صلاحیتوں کا مظاہرہ کر سکیں. سیکریٹری کھیل و امور نوجوانان عبدالعلیم لاشاری نے سندھ یوتھ کلب گلستان جوہر میں کھیلوں کے فروغ کے حوالے سے ایک اہم اجلاس کی صدارت کرتے ہوئے اس عزم کا اظہار کیا کہ وزیر کھیل سردار محمد بخش مہر صوبے بھر میں کھیلوں کے شعبے میں انقلابی تبدیلیاں لانے اور نئے ٹیلنٹ کو سامنے لانے کے لیے پرعزم ہیں۔

یہ اقدامات سندھ میں کھیلوں کے مستقبل کے لیے امید افزا ہیں.اجلاس میں محکمہ کھیل کے ایڈیشنل سیکریٹری اسداسحاق، ڈپٹی ڈائریکٹرسید حبیب اللہ، اسسٹنٹ ڈائریکٹر فرید علی اور ڈی ایس او عبدالرحیم راجپوت شریک ہوئے، اسکے علاوہ،ڈسٹرکٹ اسپورٹس افسران اسماعیل شاہ اور حاجران نواب نے بھی اجلاس میں شرکت کی اور سمر کیمپس کے انعقاد پر بریفنگ دی۔