Live Updates

میں اور سابق شوہر اداکار عمران خان دوست نہیں، شاید کسی دن بن جائیں، اونتیکا ملک

عمران خان اور اونتیکا ملک بچپن کے دوست تھے، اس جوڑے نے 2011 میں شادی کی تھی اور2019میں علیحدگی ہو گئی

بدھ 4 جون 2025 11:05

ممبئی (اُردو پوائنٹ اخبارتازہ ترین - این این آئی۔ 04 جون2025ء)بالی ووڈ اداکار عمران خان کی سابقہ اہلیہ اونتیکا ملک کا کہنا ہے کہ وہ اور عمران خان دوست نہیں ہیں، شاید کسی دن بن جائیں، چاہتی ہوں کہ بیٹی عمارہ کو دونوں والدین تک رسائی حاصل ہو۔نین دیپ رکشت کو یوٹیوب چینل پر دیے گئے انٹرویو میں اونتیکا ملک نے اس بارے میں کھل کر بات کی ہے کہ کس طرح انہوں نے اور سابق شوہر عمران خان نے اس بات کو یقینی بنایا کہ بیٹی عمارہ ان کی طلاق کے تلخ پہلووں سے کبھی متاثر نہ ہو۔

اداکار عمران خان کی سابقہ اہلیہ اونتیکا ملک نے کہا ہے کہ طلاق کے بعد ہم دونوں(عمران خان اور اونتیکا)کے درمیان خوش گوار تعلقات تو ہیں لیکن ہم حقیقت میں دوست نہیں ہیں۔اونتیکا ملک نے اس بارے میں بات کی ہے کہ وہ کس طرح اس بات کو یقینی بنانا چاہتی ہیں کہ ان کی بیٹی کو اپنے دونوں والدین تک رسائی حاصل رہے۔

(جاری ہے)

اونتیکا نے کہا کہ میرے خیال میں اصل علیحدگی تب ہوتی ہے جب ہم یہ کہتے ہیں کہ دیکھو ہم نے اپنی جوانی میں ساتھ رہنے کی اپنی پوری کوشش کی، میں جانتی ہوں کہ ہم دونوں نے اپنی بہترین کوشش کی، اگر الگ رہنے کا مطلب زیادہ خوشی لانا ہے اور یہ اس مقام پر پہنچ گیا ہے جہاں پہلے جیسی مطابقت نہیں رہی تو ایک دن آتا ہے جب اپنے آپ کو منتخب کرنا ٹھیک ہوتا ہے، میں بہت پریشان تھی، مجھے بہت وقت لگا، ہم زیادہ بات نہیں کرتے، مگر ہمارے درمیان تعلقات خوش گوار ہیں، تاہم دوست ایک بہت مضبوط لفظ ہے، جو ہم نہیں ہیں، شاید کسی دن بن جائیں۔

واضح رہے کہ عمران خان اور اونتیکا ملک بچپن کے دوست تھے، اس جوڑے نے 2011 میں شادی کی تھی۔عمران اور اونتیکا کی بیٹی عمارہ ملک خان 9 جون 2014 کو پیدا ہوئیں، 2019 میں ان دونوں کی راہیں جدا ہو گئی تھیں، اطلاعات کے مطابق عمران آج کل لیکھا واشنگٹن کے ساتھ تعلق میں ہیں۔عمران خان ایک دہائی کے بعد اداکاری میں واپسی کے لیے پوری طرح تیار ہیں، وہ بھومی پیڈنیکر کے ساتھ ایک رومانٹک کامیڈی فلم میں مرکزی کردار ادا کریں گے۔