ایک گھر میں 2 بجلی کے میٹر نہ لگانے کا فیصلہ مسترد ،اس کیخلاف تحریک مزید تیز کی جائے گی‘ضیاء الدین انصاری

جیبوں پر ڈاکہ ڈالنے کے لئے نیا طریقہ نکالا ہے، دو سو سے ایک یونٹ زیادہ استعمال کرنے کی سزا چھ مہینے تک پھگتنا ہوگی

بدھ 4 جون 2025 17:11

ایک گھر میں 2 بجلی کے میٹر نہ لگانے کا فیصلہ مسترد ،اس کیخلاف تحریک مزید ..

لاہور (اُردو پوائنٹ اخبارتازہ ترین - این این آئی۔ 04 جون2025ء) امیرجماعت اسلامی لاہور ضیاء الدین انصاری ایڈووکیٹ نے کہا ہے کہ وفاقی حکومت اور لیسکو کی جانب سے ایک گھر میں2میٹر نہ لگانے کے فیصلے کو مسترد کرتے ہیں،لیسکو کی جانب سے بجلی پر جو سلیپ سسٹم نافذ کیا گیا ہے اس وجہ سے 2 میٹر نہ لگانے کا فیصلہ کیا گیاہے جو ناقابل قبول ہے۔ ان خیالات کا اظہار انہوں نے ساندہ روڈ دفتر جماعت اسلامی لاہور میں پریس کانفرنس کرتے ہوئے کیا۔

اس موقع پر ان کے ہمراہ سیکرٹری اطلاعات جماعت اسلامی لاہورعبدالعزیز عابد،کونیئر پبلک ایڈ کمیٹی قیصر شریف،ڈپٹی سیکرٹری شاہد نوید ملک موجودتھے۔ ضیاء الدین انصاری ایڈووکیٹ نے کہا کہ لاہور سمیت ملک بھر میں جوائنٹ فیملی سسٹم ہے اور لوگ ایک ہی گھر میں رہتے ہیں تو دو میٹر لگتے ہیں جس سے لوگوں کو فائدہ ہوتا ہے۔

(جاری ہے)

وفاقی حکومت اور لیسکو کا 2 میٹر ایک گھر میں نہ لگانے کے فیصلے کو تسلیم نہیں کرتے اور اس کے خلاف تحریک مزید تیز کی جائے گی۔

بجلی کی قیمتوں میں کمی کے ثمرات تاحال عوام تک نہیں پہنچے۔جماعت اسلامی کا مطالبہ ہے کہ بجلی کی قیمتوں میں کمی کے ثمرات لوگوں تک پہنچائے جائیں۔انہوں نے کہا کہ شہر میں ڈمپر حادثات بڑھتے جا رہے ہیں لیکن حکومت اس ڈمپر مافیا کے خلاف کوئی کاروائی نہیں کر رہی ہے۔ ڈمپر حادثات میں وفات پا جانے والوں کے اہل خانہ سے حکومت کے کسی بھی نمائندے نے رابطہ نہیں کیا۔

حکومت کو چاہیے کہ وہ ڈمپر حادثات میں ہلاک ہونے والوں کی مالی معاونت کریاورڈمپر ڈرائیوروں کا ڈوپ ٹیسٹ کیا جائے۔شہر میں پبلک ٹرانسپورٹ کو مزید بڑھانے کے لئے کوئی اقدامات نہیں کیے جا رہے۔لاہور کی پبلک ٹرانسپورٹ کے حوالے سے جماعت اسلامی نے ایک کمیٹی تشکیل دی ہے جو اپنی تجاویز حکومت کو پیش کرے گی۔: ضیاء الدین انصاری ایڈووکیٹ نے کہا کہ پنجاب میں بلدیاتی انتخابات نہ ہونا بھی حکومت کی نااہلی ہیگزشتہ ادوار میں پنجاب کی حکومتوں نے اپنی سہولت کے حساب سے نئے ترامیمی لوکل گورنمنٹ بل اسمبلی سے منظور کروائے لیکن انتخابات نہ ہو سکے۔

انہوں نے کہا کہ عیدالاضحیٰ کے موقع پر شہر کی آبادی کے لئے صرف اور صرف 6 مویشی منڈی لگائی گئیں جو کہ بہت کم ہے۔ان مویشی منڈیوں میں حکومت کی آشیرباد سے بھتہ لیا جا رہا ہے۔