ایران کا امریکی دھمکی کے باوجود یورینیم افزودگی جاری رکھنے کا اعلان

امریکی تجویزخود انحصاری پر ہماری قوم کے یقین اور ’ہم کر سکتے ہیں‘ کے اصول سے متصادم ہے،ایرانی سپریم لیڈر

بدھ 4 جون 2025 20:14

ایران کا امریکی دھمکی کے باوجود یورینیم افزودگی جاری رکھنے کا اعلان

تہران(اُردو پوائنٹ اخبارتازہ ترین - آن لائن۔ 04 جون2025ء) امریکی دھمکی کے باوجود ایرانی سپریم لیڈر آیت اللہ علی خامنہ ای نے اعلان کیا ہے کہ ایران یورینیئم افزودگی ترک نہیں کرے گا۔قطری نشریاتی ادارے الجزیرہ کی رپورٹ کے مطابق ایران نے جوہری پروگرام پر طویل عرصے سے جاری تنازع کو حل کرنے کیلیے امریکی تجویز میں شامل یورینیئم افزودگی ترک کرنے کا مطالبہ مسترد کر دیا۔

آیت اللہ علی خامنہ ای کا مذکورہ بیان ایک ایسے وقت میں سامنے آیا ہے جب امریکا اور ایران جوہری معاہدے پر مذاکرات جاری رکھے ہوئے ہیں۔یورینیئم افزودگی کا معاملہ مذاکرات میں ایک اہم نکتہ ہے، امریکا نے افزودگی روکنے پر وعدہ کیا ہے کہ ایران پر مغربی پابندیاں ہٹا دی جائیں گی۔تاہم آیت اللہ علی خامنہ ای کا کہنا تھا کہ امریکی تجویز خود انحصاری پر ہماری قوم کے یقین اور ’ہم کر سکتے ہیں‘ کے اصول سے متصادم ہے۔

(جاری ہے)

ایرانی سپریم لیڈر نے کہا کہ یورینیئم افزودگی کا مسئلہ ایران کی توانائی کی آزادی کے حصول کیلیے کلیدی حیثیت رکھتا ہے، آزادی کا مطلب ہے کہ امریکا اور امریکا کی طرف سے مثبت اشارے کا انتظار نہ کیا جائے، امریکی تجویز 1979 کے اسلامی انقلاب کے نظریات کے 100 فیصد خلاف ہے۔انہوں نے مزید کہا کہ ایران اپنے فیصلوں کیلیے امریکا کی منظوری نہیں لے گا، امریکا کے سامنے جھک جانا اور جابر طاقت کے سامنے ہتھیار ڈالنا ہے یہ ہمارا نظریہ نہیں ہے۔

آیت اللہ علی خامنہ ای نے امریکا کو مخاطب کرتے ہوئے سوال کیا کہ آپ اس میں مداخلت کیوں کر رہے ہیں کہ ایران کو یورینیئم افزودگی کرنی چاہیے یا نہیں واضح رہے کہ ایران کہتا ہے وہ پرامن مقاصد کیلیے جوہری ٹیکنالوجی میں مہارت حاصل کرنا چاہتا ہے اور طویل عرصے سے مغربی طاقتوں کے ان الزامات کی تردید کرتا رہا ہے کہ وہ جوہری ہتھیار تیار کرنا چاہتا ہے۔ایران کے ساتھ مذاکرات میں امریکی وفد کی سربراہی کرنے والے امریکی ایلچی اسٹیو وٹ کوف کا کہنا ہے کہ صدر ڈونلڈ ٹرمپ افزودگی کو جاری رکھنے کی مخالفت کرتے ہوئے اسے سرخ لکیر قرار دیتے ہیں۔