Live Updates

الیکشن کمیشن میں نااہلی کیس کی سماعت ملتوی

بدھ 4 جون 2025 20:28

اسلام آباد (اُردو پوائنٹ اخبارتازہ ترین - این این آئی۔ 04 جون2025ء)الیکشن کمیشن میں عمر ایوب کے خلاف این اے 18 ہری پور میں دھاندلی سے متعلق درخواست پر چیف الیکشن کمشنر کی سربراہی میں 5 رکنی بینچ نے سماعت کی، عمر ایوب کے وکیل نے مہلت مانگ لی جس پر الیکشن کمیشن نے سماعت 24 جون تک ملتوی کر دی۔

(جاری ہے)

علاوہ ازیں اپوزیشن لیڈر عمر ایوب کے خلاف الیکشن کمیشن میں نااہلی کیس کی سماعت ہوئی، عمر ایوب نے وکیل کرنے کے لیے وقت مانگتے ہوئے استدعا کی کہ مجھے وکیل کرنا ہے جبکہ بجٹ کا عمل بھی چل رہا ہے، 27 جون کے بعد تک کیس کی سماعت رکھی جائے۔

ممبر خیبرپختونخوا نے کہا کہ آپ کا وکیل الیکشن کمیشن میں پیش ہوتا ہے، عمر ایوب نے کہا کہ وہ وکیل میرے دوسرے کیس میں پیش ہو رہا ہے، وکیل درخواست گزار نے کہا کہ 90 دن میں کیس کا فیصلہ کرنا ہے۔عمر ایوب نے کہا کہ میں فاننس کمیٹی کا رکن ہوں اور اپوزیشن لیڈر ہوں، چیف الیکشن کمشنر نے کہا کہ ہمارے پاس اگست تک وقت ہے، یہ درست کہہ رہے ہیں کہ اپوزیشن لیڈر ہیں، بجٹ سے متعلق ان کی ذمہ داری ہے۔بعد ازاں الیکشن کمیشن نے نااہلی کیس کی سماعت یکم جولائی تک ملتوی کردی۔