حج کے رکن اعظم وقوف عرفہ کیلئے لاکھوں عازمین کی میدانِ عرفات آمد

مکہ مکرمہ ( اُردو پوائنٹ اخبارتازہ ترین۔ 05 جون 2025ء ) حج کے رکنِ اعظم وقوف عرفہ کیلئے لاکھوں عازمین کی میدانِ عرفات آمد جاری ہے جہاں ہر طرف ‏لَبَّيْكَ اللَّهُمَّ لَبَّيْكَ کی روح پرور صدائیں گونجنے لگیں، حجاج آج کا دن میدانِ عرفات میں گزاریں گے۔ تفصیلات کے مطابق حج 2025ء کے سلسلے میں لاکھوں حجاج آج حج کا رکن اعظم وقوف عرفہ ادا کر رہے ہیں، اس مقصد کتے لیے وادی منیٰ سے عازمین کی میدان عرفات منتقلی کا عمل 8 ذی الحجہ کی شب سے شروع ہوا جو آج دوپہر تک جاری رہے گا، وزارت حج کی جانب سے عازمین کو وقوف عرفہ کے لیے منیٰ سے مشاعر مقدسہ ٹرین اور بسوں کے ذریعے میدان عرفات لے جایا جارہا ہے، اس دوران ٹریفک پولیس کی جانب سے شاہراہوں کو رش سے محفوظ رکھنے کے لیے بسوں کے قافلوں کے لیے الگ راستوں کا انتظام کیا گیا تاکہ حجاج کے قافلوں کو بنا کسی دشواری میدان عرفات پہنچایا جائے۔

(جاری ہے)

بتایا گیا ہے کہ حجاج آج سارا دن میدان عرفات میں گزاریں گے جہاں وہ ’قصر و جمع‘ کی صورت میں ظہر اور عصر کی نمازیں ادا کریں گے اور غروب آفتاب سے چند لمحات قبل میدان عرفات سے روانہ ہوجائیں گے، جس کے بعد حجاج قافلوں کی صورت میں مزدلفہ کے کھلے میدان میں رات بسر کریں گے جہاں سے وہ رمی کے لیے کنکریاں جمع گے اور فجر یا اس سے قبل وادی منیٰ پہنچ کر رمی کریں گے۔

معلوم ہوا ہے کہ میدان عرفات میں یوم الترویہ کو ہی ’وقوف‘ کے تمام انتظامات مکمل کیے گئے، انتظامیہ کی جانب سے صفائی کا خاص اہتمام کیا گیا جس کے لیے اضافی کارکنوں کی تعیناتی کی گئی، صفائی کی گاڑیاں اورمنیٰ ٹرکس کی نقل و حرکت کو منظم بنانے کے لیے جامع حکمت عملی پرعمل کیا جارہا ہے، اس کے علاوہ وزارت صحت کی متعدد ٹیموں کو میدانَ عرفات میں مقرر کیا گیا ہے جن میں خصوصی ’ایمبولیس کارٹ‘ بھی شامل ہے جو مریضوں کو رش والے مقام سے نکال کر ان کی قریب ترین شاہراہ پر موجود ایمبولینس تک منتقلی یقنی بناتے ہیں۔

بتایا جارہا ہے کہ صحت نگران ٹیموں کا نیٹ ورک میدانِ عرفات میں قائم ہے جن میں مرکزی ہسپتال کے ساتھ ساتھ ڈسپینسریاں بھی اس کا حصہ ہیں، ہلال الاحمر کے متحرک یونٹس بھی عرفات میں حجاج کی دیکھ بھال کے لیے موجود ہیں جو ہرطرح کے ہنگامی طبی امدادی سامان اور آلات سے لیس ہیں جب کہ پرمٹ کے بغیرحج پر پابندی پر سختی سے عمل کیا جارہا ہے جس کے تحت پرمٹ کے بغیر کسی کو بھی مشاعر مقدسہ میں جانے کی اجازت نہیں، اس کی نگرانی کے لیے مشاعر مقدسہ کے تمام داخلی راستوں پرچیک پوسٹیں قائم کی گئی ہیں۔