لیاری ٹاون کے ریٹائر ملازمین کے 132 کیسز تاحال کے ایم سی میں جمع نہیں کروائے گئے،سید ذوالفقار شاہ

جمعرات 5 جون 2025 22:20

کراچی (اُردو پوائنٹ اخبارتازہ ترین - این این آئی۔ 05 جون2025ء)سجن یونین سی بی اے کے ایم سی کے مرکزی صدر سید ذوالفقارشاہ نے کہا ہے کہ عدالتی احکامات اور توہین عدالت کے نوٹس کے اجرا کے باوجود لیاری ٹائون کراچی کا واحد ٹاون ہے کہ جس نے اکتوبر 2023 کے بعداور اس سے قبل ریٹائر ووفات پاجانے والے 132ملازمین کے پینشن کیسز کے ایم سی کے محکمہ انٹرنل آڈٹ کو نہیں بھیجے جس سے اس ٹائون کے ریٹائر ووفات پاجانے والے ملازمین کی بیواوں میں بے چینی و بے یقینی کی کیفیت پائی جاتی ہے۔

اسی طرح کراچی کے تمام ٹاونز کے ملازمین سے اس ماہ کی تنخواہ میں انکم ٹیکس اور پروفیشنل ٹیکس کی مد میں ایک لاکھ روپئے تک کی کٹوتی کردی اور اس کا ثبوت پے سلپس تک نہیں دی جارہی ہیں جبکہ صفورا ٹاون کے ملازمین کو آخری ورکنگ ڈے تک تنخواہیں ادا نہیں کی گئی ہیں۔

(جاری ہے)

جس سے صفورا ٹاون کے ملازمین میں سخت بے چینی پائی جاتی ہے۔صدر ٹاون کے ایجوکیشن ملازمین کو 1997 اور 2009 میں سروس میں آنے کے باوجود اورحکومتی نوٹیفیکشن کے اجرا کے باوجود ٹائم اسکیل کی سہولت سے محروم رکھنے پر سجن یونین کے صدر سید ذوالفقارشاہ نے میونسپل کمشنر صدر ٹاون نورحسن جوکھیو سے ملاقات کرکے انہیں ٹائم اسکیل کی سہولت دینے کی درخواست کی۔

جس پر میونسپل کمشنر نورحسن جوکھیو نے انہیں یقین دلایا کہ وہ دوبارہ لوکل گورنمنٹ کو خط لکھ کر ان سے ان حکومتی نوٹیفیکشن کے لاگو ہونے کی کلیرنس کے بعد ٹائم اسکیل کی سہولت فراہم کریں گے۔سید ذوالفقارشاہ نے پینشنرز اور ٹی ایم سیز کے ریٹائرملازمین کے پینشن کیسز کی پیش رفت کے سلسلے میں فنانشل ایڈوائزر کے ایم سی گلزار علی،ڈائریکٹر ویلفیئر کے ایم سی محمود بیگ سے ملاقات کی۔

انہوں نے بتایا کہ 1300 سے زائد ریٹائر ٹی ایم سیز ملازمین کے پینشن کیسز مکمل ہونے کے بعد متعلقہ ٹی ایم سیز کو بھیج دیئے گئے ہیں۔جبکہ لیاری ٹاون نے 132 ریٹائر ملازمین و بیواوں کے کیسز تاحال کے ایم سی انٹرنل آڈٹ کو جمع نہیں کروائے ہیں۔جبکہ اس ماہ ترتیب کے لحاظ سے جون 2018 کے ریٹائر ووفات یافتہ ملازمین کی بیواوں کو 7 کروڑ 38 لاکھ کی ادائیگیاں کی جارہی ہیں۔فنانشل ایڈوائزر نے انہیں عدالتی احکامات کے تحت فائنل کردہ ٹی ایم سیز کے 1300 ملازمین کوپینشن کی ادائیگی کے لیے فنانس ڈیپارٹمنٹ سے فنڈ کی فراہمی کیلیے کوشش کرنے پر زور دیا۔اس موقع پر یونین رہنما عباس احمد بھی ہمراہ تھے۔