عیدالاضحیٰ کے موقع پر کانگو وائرس کے ممکنہ خطرات کے پیش نظر ڈپٹی کمشنر کی متعلقہ اداروں کو فوری اقدامات کی ہدایت

جمعرات 5 جون 2025 20:00

کوئٹہ (اُردو پوائنٹ اخبارتازہ ترین - اے پی پی۔ 05 جون2025ء) عیدالاضحیٰ کے موقع پر کانگو وائرس (CCHF) کے ممکنہ خطرات کے پیش نظر ڈپٹی کمشنر گوادر نے متعلقہ اداروں کو فوری اقدامات کی ہدایت جاری کر دی ہے۔ یہ ہدایات محکمہ صحت بلوچستان کے 4 جون 2025 کے مراسلے کی روشنی میں جاری کی گئیں۔

(جاری ہے)

ڈپٹی کمشنر نے قربانی کے جانوروں کی غیر منظم نقل و حرکت اور غیر محفوظ طریقوں پر قابو پانے کے لیے درج ذیل اقدامات کا حکم دیا ہے جن میں جانوروں کے لیے مخصوص اور محفوظ مقامات کا تعین ،اسپرے و نگرانی کا بندوبست، غیر مجاز مقامات پر جانور رکھنے پر مکمل پابندی، عید کے دوران صفائی، آلائشوں کی فوری تلفی اور ویسٹ کلیکشن کا مؤثر نظام، ویٹرنری جانچ اور انسداد کانگو اسپرے کی لازمی پابندی، صحت، لائیوسٹاک، بلدیات اور قانون نافذ کرنے والے اداروں میں مکمل ہم آہنگی شامل ہیں۔

ڈپٹی کمشنر نے عوامی آگاہی پر زور دیتے ہوئے کہا کہ بروقت اقدامات سے ایک بڑے خطرے سے بچا جا سکتا ہے۔ عوامی صحت کا تحفظ ہم سب کی مشترکہ ذمہ داری ہے۔