علی امین گنڈاپور پر رشوت دینے کا الزام، الیکشن کمیشن میں نااہلی کیلئے درخواست دائر

دوسرے صوبے کی بار ایسوسی ایشن کو فنڈ دینا صوبے کی امانت میں خیانت ہے، درخواست گزار

جمعرات 5 جون 2025 21:00

پشاور (اُردو پوائنٹ اخبارتازہ ترین - این این آئی۔ 05 جون2025ء)وزیراعلی خیبر پختونخوا کی نااہلی کیلئے الیکشن کمیشن میں درخواست دائر کردی گئی۔علی امین گنڈاپور کیخلاف درخواست ارسلان آفریدی ایڈووکیٹ نے الیکشن کمیشن میں دائر کی جس میں مو قف اختیار کیا گیا ہے کہ وزیر اعلی نے لاہور بار ایسوسی ایشن کو 5 کروڑ روپے کا فنڈ دینے کا فیصلہ کیا ہے اور صوبائی کابینہ نے فنڈ دینے کی منظوری دی ہے۔

درخواست کے مطابق دوسرے صوبے کی بار ایسوسی ایشن کو فنڈ دینا رشوت کے زمرے میں آتا ہے۔ وزیر اعلی نے صوبے کی امانت میں خیانت کی ہے۔

(جاری ہے)

صوبے کے فنڈ کو دوسرے صوبے میں استعمال ایمرجنسی یا کسی آفت کی صورت میں کیا جا سکتا ہے۔الیکشن کمیشن میں دائر درخواست میں کہا گیا ہے کہ صوبے کو پہلے ہی معاشی مشکلات کا سامنا ہے، اوپر سے صوبے کے خزانے سے فنڈ باہر استعمال ہورہے ہیں۔

وزیراعلی نے صوبے کے اعتماد کو ٹھیس پہنچائی ہے اور اپنے مینڈیٹ و حلف کی خلاف ورزی کی ہے۔درخواست کے مطابق فنڈ کے استعمال سے متعلق سپریم کورٹ کے فیصلے اور آئین اور این ایف سی ایوارڈ موجود ہے، لہذا وزیراعلی کو نااہل قرار دیا جائے اور قانون کے مطابق کارروائی کی جائے۔ وزیر اعلی کو صوبائی اسمبلی کی سیٹ سے ڈی نوٹیفائی کیا جائے۔