ٹک ٹاکر ثنا یوسف کے قتل کے خلاف عورت مارچ اسلام آباد کا مظاہرہ

جمعہ 6 جون 2025 17:30

اسلام آباد (اُردو پوائنٹ اخبارتازہ ترین - این این آئی۔ 06 جون2025ء)عورت مارچ اسلام آباد کے منتظمین کی جانب سے قتل کی گئی کم عمر ٹک ٹاکر ثنا یوسف کو انصاف دلانے کے لیے مظاہرہ کیا گیا،جس میں عام شہریوں نے بھی شرکت کی۔ثنا یوسف کو 2 جون کو ان کے گھر میں گھس کر فائرنگ کرکے قتل کیا گیا تھا، پولیس نے ایکشن لیتے ہوئے 3 جون کو ملزم کے خلاف مقدمہ دائر کرکے اسے گرفتار کرلیا تھا۔

پولیس نے بتایا تھا کہ 17 سالہ ثنا یوسف کو فیصل آباد سے تعلق رکھنے والے 22 سالہ ملزم عمر حیات نے دوستی سے انکار پر قتل کیا۔

(جاری ہے)

ثنا یوسف کے قتل کے خلاف شوبز شخصیات سمیت سیاسی و سماجی شخصیات نے بھی اظہار افسوس کرتے ہوئے قاتل کو سخت سے سخت سزا دینے کا مطالبہ کیا ہے اور اب اسلام آباد میں عورت مارچ کے منتظمین کی جانب سے مقتولہ کو انصاف دلانے کے لیے مظاہرہ کیا گیا۔عورت مارچ کی جانب سے اسلام آباد پریس کلب کے باہر ثنا یوسف کو انصاف دلانے کے لیے مظاہرہ کیا گیاجس میں بڑی تعداد میں نوجوان افراد نے شرکت کی اور قاتل کو سخت سے سخت سزا دینے کا مطالبہ کیا۔مظاہرین نے میرا جسم، میری مرضی سمیت دیگر نعرے بھی لگائے جبکہ انہوں نے مختلف نعروں کے بینرز بھی اٹھا رکھے تھے۔