Live Updates

گوجری میں قتل ہونے والے نوجوان عمران خان کو نماز جنازہ کی ادائیگی کے بعد سپرد خاک کر دیا گیا

اتوار 8 جون 2025 12:40

ایبٹ آباد (اُردو پوائنٹ اخبارتازہ ترین - اے پی پی۔ 08 جون2025ء) گوجری میں قتل ہونے والے نوجوان عمران خان ولد اکرم خان کو نماز جنازہ کی ادائیگی کے بعد سپرد خاک کر دیا گیا۔ مقتول کے بھائی نوید خان کی مدعیت میں تھانہ مانگل میں زیر دفعہ 302 ایف آئی آر درج کر لی گئی جس میں امتیاز، آصف اور زاہد پسران خالقداد سکنہ گوجری پر قتل کی دعویداری کی گئی ہے۔

ایف آئی آر کے مطابق عیدالاضحی کے دوسرے روز ایبٹ آباد کے علاقہ گوجری میں مقتول عمران اپنی چھوٹی بچی کے ہمراہ اپنے گھر کے قریب واقع دکان سے ٹافیاں خرید کر دینے گیا۔

(جاری ہے)

اسی اثناءمیں گلی میں بچوں نے پٹاخے پھٹائے۔ مقتول نے بچوں کو منع کیا تو وہ بھاگ گئے مگر زاہد ولد خالقداد نے عمران خان سے توں تکرار شروع کر دی جسے رفع دفع کر کے عمران بچی کو لیکر گھر آ گیا۔

کچھ دیر بعد زاہد اپنے دو بھائیوں امتیاز اور آصف کے ہمراہ اسلحہ لیکر آیا اور عمران کو باہر بلایا۔ باہر جاتے ہی گالم گلوچ کرتے ہوئے فائرنگ کر دی جس سے عمران خان کی چھاتی میں گولیاں لگیں اور وہ موقع پر جاں بحق ہو گیا جبکہ نوید خان بھی زخمی ہوا۔ ملزمان موقع سے فرار ہو گئے۔ مزید تفصیلات پولیس کی تفتیش کے بعد سامنے آئیں گی تاحال کوئی ملزم گرفتار نہیں ہوا۔