راولپنڈی ویسٹ مینجمنٹ کمپنی کے عیدالاضحیٰ پر صفائی کے بہترین انتظامات قابل تحسین اور لائق تقلید ہیں،بیرسٹر دانیال چوہدری

اتوار 8 جون 2025 20:10

راولپنڈی (اُردو پوائنٹ اخبارتازہ ترین - اے پی پی۔ 08 جون2025ء) وفاقی پارلیمانی سیکرٹری برائے اطلاعات و نشریات بیرسٹر دانیال چوہدری نے کہا ہے کہ راولپنڈی ویسٹ مینجمنٹ کمپنی (آر ڈبلیو ایم سی) کی جانب سے عیدالاضحیٰ کے موقع پر صفائی کے بہترین انتظامات قابل تحسین اور لائق تقلید ہیں۔ وزیر اعلیٰ پنجاب مریم نواز کی خصوصی ہدایات پر عمل کرتے ہوئے "ستھرا پنجاب پروگرام" کے تحت راولپنڈی میں قربانی کے جانوروں کی باقیات اور آلائشوں کو بروقت اٹھانے، جراثیم کش ادویات کے اسپرے اور عوامی آگاہی مہم جیسے اقدامات قابل ذکر ہیں۔

اپنے ایک پیغام میں بیرسٹر دانیال چوہدری نے کہا کہ عیدالاضحیٰ کے موقع پر قربانی کے ساتھ ساتھ صفائی کو یقینی بنانا بھی ہر شہری کا فرض ہے۔ انہوں نے عوام سے اپیل کی کہ وہ قربانی کی آلائشیں مقررہ مقامات پر رکھیں اور ویسٹ بیگز کا استعمال یقینی بنائیں تاکہ شہر کو صاف ستھرا رکھا جا سکے۔

(جاری ہے)

انہوں نے کہا کہ صفائی نصف ایمان ہے اور ایک مہذب معاشرے کی پہچان ہے کہ وہ اپنے اردگرد کے ماحول کو صاف اور خوشگوار رکھے۔

اپنے گھروں، گلیوں، محلوں اور پورے شہر کی صفائی ہمارا قومی و شہری فریضہ ہے تاکہ ہم سب مل کر ایک صحت مند ماحول تشکیل دے سکیں۔ انہوں نے شہریوں کو ہدایت کی کہ اگر صفائی کے حوالے سے کوئی شکایت ہو تو وہ فوراً راولپنڈی ویسٹ مینجمنٹ کمپنی کی ہیلپ لائن 1139 یا سوشل میڈیا پلیٹ فارمز کے ذریعے رابطہ کریں تاکہ فوری کارروائی کی جا سکے۔ انہوں نے اس بات پر زور دیا کہ عوامی تعاون ہی صفائی مہم کی کامیابی کا اصل ضامن ہے۔ ستھرا اور صحت مند پنجاب ہماری اجتماعی ذمہ داری ہے اور ہمیں اپنی نسلوں کے بہتر مستقبل کے لیے اس مہم میں بھرپور شرکت کرنی چاہیے۔