عمران خان نے تمام آفرز مسترد کر کے حقیقی آزادی کا علم بلند کیا ہے، اسد قیصر

صوابی(اُردو پوائنٹ اخبارتازہ ترین - این این آئی۔ 05 اگست2025ء)سابق سپیکرقومی اسمبلی اسدقیصرنے کہاہے کہ عمران خان نے تمام آفرز مسترد کر کے حقیقی آزادی کا علم بلند کیا ہے،عدالتیں آزاد نہیں، انصاف کا خون کیا جا رہا ہے،ہم عالمی عدالت انصاف کا دروازہ کھٹکھٹائیں گے،14اگست کو احتجاج کے دوسرے مرحلے میں سندھ کا رخ کیا جائیگا،ہم اپنے صوبے میں کسی صورت فوجی آپریشن کی اجازت نہیں دیں گے، یہ آزادی کی جنگ ہے جو ہم لڑیں گے۔

منگل کوپاکستان تحریک انصاف کے مرکزی رہنما و سابق اسپیکر قومی اسمبلی اسد قیصر نے صوابی میں احتجاجی مظاہرے سے خطاب کرتے ہوئے کہا کہ عمران خان کو جیل میں مختلف آفرز دی گئیں، جن میں بنی گالا، نتھیا گلی اور بیرون ملک جانے کی سہولت شامل تھی، مگر عمران خان نے تمام آفرز ٹھکرا کر واضح پیغام دیا کہ مسئلہ محض رہائی کا نہیں بلکہ حقیقی آزادی کا ہے۔

(جاری ہے)

انہوں نے کہا کہ وفاقی حکومت عوامی مینڈیٹ سے نہیں بلکہ فارم 47کے ذریعے اقتدار میں آئی۔انہوںنے کہاکہ چینی اسکینڈل میں اربوں روپے کمائے گئے اور اب ایک بار پھر چینی کی امپورٹ کے ذریعے کرپشن کا نیا کھیل کھیلا جا رہا ہے۔ اسد قیصر نے کہا کہ ہم نے اس سلسلے میں چیف جسٹس سے شفاف انکوائری کی درخواست دی ہے تاکہ عوام کو حقائق سے آگاہ کیا جا سکے۔

انہوں نے کہا کہ بلاول بھٹو اور آصف علی زرداری نے کرپشن کے نئے ریکارڈ قائم کیے ہیں اور یہ دونوں پارٹیاں صرف ذاتی مفادات کے لیے اقتدار میں آتی ہیں۔پی ٹی آئی رہنما نے خیبر پختونخوا میں جاری لوڈشیڈنگ کو "عوام کے خلاف انتقامی کارروائی"قرار دیتے ہوئے کہا کہ ہمارے صوبے میں بجلی کی غیرمنصفانہ بندش کے ذریعے عوام کو سزا دی جا رہی ہے۔اسد قیصر نے کہا کہ عمران خان نے واضح احکامات جاری کیے ہیں کہ خیبر پختونخوا میں کسی بھی قسم کا فوجی آپریشن قبول نہیں کیا جائے گا۔

انہوں نے کہا کہ ہمارے دور میں نہ دھماکے ہوئے نہ امن و امان خراب ہوا، مگر آج ہمیں بارود تھمایا جا رہا ہے، قلم چھینے جا رہے ہیں۔انہوں نے کہا کہ ہم اپنے صوبے میں کسی صورت فوجی آپریشن کی اجازت نہیں دیں گے، یہ آزادی کی جنگ ہے جو ہم ہر حال میں لڑیں گے۔عدالتی فیصلوں پر عدم اطمینان کا اظہار کرتے ہوئے اسد قیصر نے کہا کہ عدالتیں آزاد نہیں، انصاف کا خون کیا جا رہا ہے، اگر ہمیں اندرونِ ملک انصاف نہ ملا تو ہم عالمی عدالت انصاف کا دروازہ کھٹکھٹائیں گے۔انہوں نے اعلان کیا کہ 14اگست کو احتجاج کے دوسرے مرحلے کا آغاز کیا جائے گا جس میں سندھ کا رخ کیا جائے گا۔ اسد قیصر نے کہا کہ ہم پورے ملک کو متحد کریں گے اور ظالم حکومت سے نجات دلائیں گے۔