وزیراعلیٰ نے کشمیر کا اسپیشل اسٹیٹس ختم کرنے کو انسانیت سے غداری قرار دے دیا

کراچی (اُردو پوائنٹ اخبارتازہ ترین - این این آئی۔ 05 اگست2025ء)وزیراعلیٰ سندھ سید مراد علی شاہ نی5 اگست 2019 کو مودی حکومت کی جانب سے مقبوضہ جموں و کشمیر کا اسپیشل اسٹیٹس ختم کرنے کو صرف کشمیری عوام بلکہ انسانیت سے غداری قرار دے دیا۔ انہوں نے کہا کہ اس سال مئی میں بھارت نے آزاد کشمیر پر حملے کی کوشش کی جسے پاک فوج اور پوری قوم نے مل کر ناکام بنادیا۔

وزیراعلی سندھ یومِ استحصال کشمیر کے موقع پر سندھ اسمبلی میں خطاب کر رہے تھے۔ اسمبلی میں مقبوضہ کشمیر کے اسپیشل اسٹیٹس کے خاتمے اور بھارتی قبضے کے خلاف قرارداد پیش کی گئی جسے ایوان نے متفقہ طور پر منظور کرلیا۔ مراد علی شاہ نے مزہد کہا کہ جموں و کشمیر کے عوام کو حاصل اسپیشل ریذیڈنسی کا حق چھین کر بین الاقوامی قوانین، انسانی حقوق اور اقوام متحدہ کی قراردادوں کی سنگین خلاف ورزی کی گئی۔

(جاری ہے)

یہ پہلا موقع ہے کہ کسی حکومت نے اپنے ہی شہریوں سے اس سطح کی غداری کی ہو۔ وزیراعلی سندھ نے کہا کہ انہیں اس بات پر فخر ہے کہ وہ اس جماعت سے تعلق رکھتے ہیں جس کے بانی شہید ذوالفقار علی بھٹو نے بطور وزیر خارجہ اور وزیر اعظم عالمی سطح پر کشمیریوں کا مقدمہ مثر انداز میں لڑا۔ ان کا کہنا تھا کہ ہمیں آج بھی ان کے یہ الفاظ یاد ہیں کہ وہ نیند میں بھی کشمیر پر غلطی نہیں کر سکتے۔

انہوں نے محترمہ بے نظیر بھٹو کا بھی ذکر کرتے ہوئے کہا کہ وہ جلا وطنی کے دوران بھی عالمی سطح پر کشمیری تنظیموں سے رابطہ رکھتی تھیں، جب دنیا ان سے بات کرنے کو تیار نہ تھی۔مراد علی شاہ نے صدر آصف علی زرداری کی جانب سے اقوام متحدہ اور دیگر عالمی فورمز پر کشمیر کا مقدمہ اٹھانے اور چیئرمین بلاول بھٹو زرداری کی بطور وزیر خارجہ کوششوں کو بھی سراہا۔

وزیراعلی نے کہا کہ اس سال 6 سے 10 مئی کے دوران بھارت نے پاکستان اور آزاد جموں و کشمیر پر حملہ کرنے کی کوشش کی لیکن پاکستان کی مسلح افواج اور پوری قوم نے بھرپور دفاع کیا۔ ہم نے ان کے جہاز گرائے، اثاثے تباہ کیے اور ایئر بیس نشانہ بنایا۔ آخر کار بھارت کو سیز فائر کے لیے امریکا کو درخواست دینا پڑی۔ انہوں نے کہا کہ کشمیر پاکستان کی شہ رگ ہے اور سندھ کی عوام، حکومت اور اسمبلی کشمیری عوام کے حقِ خودارادیت کی مکمل حمایت کرتی ہے۔

ہم بھارت کے مظالم کو مسترد کرتے ہیں اور اقوام متحدہ کی قراردادوں کے مطابق کشمیریوں کو اپنا مستقبل طے کرنے کا حق دینے کا مطالبہ کرتے ہیں۔وزیراعلی نے اسرائیلی مظالم کی بھی شدید مذمت کرتے ہوئے کہا کہ غزہ میں اسرائیل انسانیت کی تذلیل کر رہا ہے، امداد بند ہے، بحران شدید تر ہوتا جا رہا ہے، اور یہ صرف مذہب کا نہیں، انسانیت کا مسئلہ ہے۔ انہوں نے عالمی برادری سے مطالبہ کیا کہ وہ اسرائیل کے خلاف متحد ہو کر فوری کارروائی کرے۔