کشمیر پر چھائی سیاہ رات ضرور ختم ہوگی ،آزادی کا سورج جلدطلوع ہوگا‘مریم نواز

منگل 5 اگست 2025 22:27

لاہور (اُردو پوائنٹ اخبارتازہ ترین - این این آئی۔ 05 اگست2025ء) وزیراعلیٰ پنجاب مریم نواز شریف نے کہا ہے کہ بھارتی مقبوضہ جموں وکشمیر کے غیور بہن بھائیوں کی قربانیوں کو سلام پیش کرتی ہوں، مقبوضہ جموں و کشمیر کی آزادی لوح تقدیر پر ثبت ہو چکی ہے، کشمیر فیصلہ کرے گا ہم ساتھ کھڑے تھے،ہیں اور رہیں گے۔وزیراعلیٰ پنجاب مریم نواز شریف نے یومِ استحصالِ کشمیر پر اپنے خصوصی پیغام میں کہا کہ پانچ اگست 2019 سے بھارتی مظالم میں بے محابا اضافے کے باوجود کشمیریوں کا حوصلہ اور ہمت قابل تحسین ہے۔

بھارتی مقبوضہ جموں و کشمیر کا مسئلہ عالمی ضمیر پر سوال ہے۔ وزیراعلیٰ مریم نواز شریف نے کہا کہ حق خودارادیت کی جدوجہد میں کشمیری بہن بھائیوں کی قربانیوں کو خراج عقیدت پیش کرتی ہوں۔

(جاری ہے)

مقبوضہ جموں و کشمیر میں بھارتی مظاہرین پر عالمی برادری کی بے حسی اور مجرمانہ خاموشی تاریخ کا سیاہ باب ہے۔ کشمیرپر چھائی سیاہ رات ضروری ختم ہوگی اور آزادی کا سورج جلد طلوع ہوگا۔

برصغیر میں مستقل امن کیلئے مسئلہ کشمیر کا حل ناگزیر ہے۔ ہزاروں کشمیری شہداء کی قربانیاں رائیگاں نہیں جائیں گی۔وزیراعلیٰ مریم نواز شریف نے کہا کہ بھارت ظلم کرکے کشمیریوں کے حق خودارادیت کو دبانے کی ناکام کوشش کررہا ہے۔ کشمیر ہر پاکستانی کے دل میں دھڑک رہا ہے۔ بھارت کے ظلم و ستم کی وجہ سے کشمیری ایک دہائی سے لاک ڈاؤن کی زندگی گزار رہے ہیں۔

کشمیریوں پر انسانیت سوز مظالم پر مستقل بے حسی عالمی ضمیر کے خلاف چارج شیٹ ہے۔ وزیراعلیٰ مریم نواز شریف نے کہا کہ بھارت کا ظلم وقتی ہے لیکن کشمیر کی آزادی مقدر ہے۔ مقبوضہ کشمیر میں انسانی حقوق کی پامالی ناقابل قبول ہے۔ دنیا کوکشمیر میں ہونے والی انسانی حقوق کی خلاف ورزی پر توجہ دینے کی سخت ضرورت ہے۔ بھارت کا قبضہ غیر قانونی، غیر اخلاقی اور غیر انسانی ہے۔ کشمیر کی سیاہ رات کا سورج ضرور طلوع ہوگا۔ وزیراعلیٰ مریم نواز شریف نے کہا کہ دنیا پر کھل چکاہے مسئلہ کشمیر بھارت کا داخلی معاملہ نہیں بلکہ انسانی المیہ بن چکا ہے۔ خطے کے ڈیڑھ ارب سے زیادہ لوگ امن اور خوشحالی کی سحر دیکھنے کے مستحق ہیں۔