پنجاب بھر میں عید پر مختصر وقت میں بہترین صفائی کا ریکارڈ قائم

پیر 9 جون 2025 10:55

مکوآنہ (اُردو پوائنٹ اخبارتازہ ترین - این این آئی۔ 09 جون2025ء)پنجاب حکومت نے عید الاضحیٰ کے موقع پر مختصر وقت میں بہترین صفائی کا ریکارڈ قائم کردیا جس پر عوام نے خوشی جبکہ وزیراعلیٰ مریم نواز نے اطمینان کا اظہار کیا ہے۔وزیراعلیٰ پنجاب مریم نواز عید کے پہلے اور دوسرے روز بھی صفائی انتظامات کی ذاتی طورپر بھرپور مانیٹرنگ میں مصروف ہیں، مریم نواز نے صوبہ بھر سے صفائی ستھرائی کے انتظامات پر مثبت ردعمل ملنے پر اظہار اطمینان کیا اور متعلقہ اداروں کو شاباش دی۔

معید صفائی مہم کی کامیابی کے لیے ہر ڈویژن میں کمشنر، ہر ضلع میں ڈپٹی کمشنر او ر ہر تحصیل میں اسسٹنٹ کمشنر صفائی انتظامات کے لئے خود فیلڈ میں نکل آئے،کمشنرز، ڈپٹی کمشنرز اور اسسٹنٹ کمشنرز نے گھر گھر جا کر چیکنگ کی اور عوام سے فیڈ بیک لیا۔

(جاری ہے)

رپورٹ کے مطابق ستھرا پنجاب پروگرام کے تحت عیدسے ایک روز پہلی94فیصد ویسٹ کولیکشن کی گئی جبکہ عید کے روز ایک لاکھ 11ہزار ٹن ویسٹ ٹھکانے لگایا گیا،ستھرا پنجاب پروگرام کے تحت عوام کی 85فیصد شکایات کا فوری ازالہ کیا گیا۔

عید کے موقع پرایک لاکھ 40ہزار ورکر ز ویسٹ کولیکشن کے لئے فیلڈ میں سرگرم عمل ہیں جبکہ عید آپریشن میں 38ہزار گاڑیوں اورویسٹ کولیکشن کے لئے 3لاکھ 80ہزارسے زائد آلات کا استعمال کیا جارہا ہے۔ویسٹ کولیکشن کے لئے پہلی مرتبہ ایک کروڑ 20لاکھ ڈسپوزیبل بیگز تقسیم کیے گئے جبکہ آلائشوں کی بروقت تلفی یقینی بنانے کے لئے یونین کونسلز کی سطح پر3ہزار 970کیمپس قائم کیے گئے ہیں۔

جانوروں کی آلائشوں سے پھیلے تعفن کو دور کرنے لئے 30ہزار لیٹر سے زائد عرق گلاب جبکہ ایک لاکھ43ہزار لیٹر فینائل کا استعمال کیا جارہا ہے، صفائی کیلئے 29 لاکھ 87 ہزار کلو گرام چونا استعمال کیاگیا۔اب تک کی صورتحال کے مطابق صوبائی دارالحکومت لاہور، بہاولپور اور سرگودھا ٹارگٹ سے 100فیصد زائد ویسٹ کولیکشن کے ساتھ سرفہرست ہیں جبکہ ڈیرہ غازی خان، فیصل آباد، گوجرانوالہ،سیالکوٹ،ملتان اور ساہیوال 80فیصد تک ویسٹ کولیکشن ہو چکی ہے۔