انسپکٹر جنرل پولیس (آئی جی پی)اسلام آباد سید علی ناصر رضوی کا ڈیوٹی پوائنٹس کا دورہ

پیر 9 جون 2025 14:40

اسلام آباد (اُردو پوائنٹ اخبارتازہ ترین - اے پی پی۔ 09 جون2025ء) انسپکٹر جنرل پولیس (آئی جی پی)اسلام آباد سید علی ناصر رضوی نے پیر کو وفاقی دارالحکومت کے مختلف ڈیوٹی پوائنٹس کا دورہ کیا اور عید کے تہوار کے موقع پر ڈیوٹی پر تعینات پولیس افسران سے ملاقات کی۔اسلام آباد پولیس حکام نے کہا ہے کہ آئی جی نے آن ڈیوٹی افسران کو مبارکباد دی، گلے ملے اور ان کے عزم اور قربانیوں کے اعتراف میں عید کے تحائف بھی تقسیم کئے۔

سید علی ناصر رضوی نے کہا کہ اسلام آباد پولیس کے حکام نے شہریوں کے لیے پرامن عید کو ممکن بنایا اور دوسروں کی حفاظت کے لیے اپنی خوشیوں کو قربان کیا ہے۔انہوں نے کہا کہ تمام افسران اپنی فرض شناسی پر دلی تحسین اور خراج تحسین کے مستحق ہیں۔ آئی جی نے کہا کہ مجھے اپنی فورس پر فخر ہے۔

(جاری ہے)

انہوں نے کہا کہ عید کے موقع پر سیف سٹی کنٹرول روم کے ذریعے شہر بھر کی مانیٹرنگ کی جا رہی ہے، سیکیورٹی انتظامات کی نگرانی کے لیے آئی جی خود فیلڈ میں موجود ہیں۔

آئی جی نے کہا کہ فیملیز اور سیاحوں کی حفاظت کو یقینی بنانے کے لیے پارکوں اور تفریحی مقامات پر خصوصی سیکیورٹی فورس تعینات کی گئی ہے۔انہوں نے کہا کہ پولیس کی گشتی ٹیمیں شہر بھر میں امن و امان برقرار رکھنے کے لیے سرگرمی سے فرائض سرانجام دے رہی ہیں جبکہ ٹریفک کی روانی کو یقینی بنانے کے لیے اسلام آباد ٹریفک پولیس کی جانب سے وقف ٹیمیں تشکیل دی گئی ہیں۔سید علی ناصر رضوی نے کہا کہ عوام کی سہولت اسلام آباد پولیس کی اولین ترجیح ہے۔