اسمبلی کا بجٹ اجلاس آدھا گھنٹہ تاخیر سے شروع ، وزیر خزانہ کی تقریر کے دور ان اپوزیشن کا شدید شورشرابہ

اسلام آباد (اُردو پوائنٹ اخبارتازہ ترین - این این آئی۔ 10 جون2025ء)قومی اسمبلی میں اپوزیشن نے وزیر خزانہ سینیٹر محمد اور نگزیب کی بجٹ تقریر کے دور ان شدید احتجاج ، شورشرابہ کرتے ہوئے ایجنڈا کی کاپیاں پھاڑ دیں ، اپوزیشن اراکین نے بجٹ تقریر کے دور ان نعرے بازی جاری رکھی جس کے باعث ایوان مچھلی منڈی کا منظر پیش کر نے لگا،(ن)لیگی اراکین نے وزیراعظم کے گرد حصار بنا ئے رکھا ۔

تفصیلات کے مطابق قومی اسمبلی کے اجلاس کا وقت پانچ بجے مقرر تھا تاہم اسپیکر قومی اسمبلی ایاز صادق کی زیر صدارت بجٹ اجلاس تقریبا ً آدھا گھنٹہ تاخیر سے شروع ہوا ۔اجلاس کا آغاز تلاوت کلام پاک سے ہوا اور پھر معمول کے مطابق نعت رسول مقبول ؐ پیش کی گئی۔اس کے بعد تمام اراکین نے احترام میں کھڑے ہوکر قومی ترانہ پڑھا۔

(جاری ہے)

قومی اسمبلی بجٹ اجلاس کے دوران اپوزیشن لیڈر نے بات کی اجازت کا مطالبہ کیا، اجازت نہ ملنے پر احتجاج شروع کیا، اپوزیشن نے ایوان میں شور شرابہ کرتے ہوئے ڈیسک بجا کر نعرے لگا کر احتجاج کیا، اپوزیشن اراکین نے ایجنڈا کی کاپیاں پھاڑ دیں، اپوزیشن اراکین نے مسلسل احتجاج، شور شرابہ جاری رکھا اس دور ان مسلم لیگ ن کے اراکین نے وزیراعظم کے گرد حصار بنا دیا۔

وفاقی وزیر خزانہ سینیٹر محمد اور نگزیب کی تقریر کے دور ان بھی اپوزیشن کی جانب سے شدید احتجاج اورشورشرابہ کیاگیا جس کے باعث ایوان منڈی مچھلی کا منظر پیش کر نے لگا۔اجلاس میں پی ٹی آئی کے اراکین نے ہاتھوں میں احتجاجی پلے کارڈز اٹھا رکھے تھے جن پر عمران خان کی رہائی کے نعرے درج تھے۔ قومی اسمبلی کے اجلاس سے قبل ہاؤس بزنس ایڈوائزری کمیٹی کا اجلاس ہوا جس میں قومی اسمبلی کے بجٹ اجلاس کو 27جون تک جاری رکھنے کا فیصلہ کیاگیا ہے ۔

اجلاس کے دور ان اسپیکر قومی اسمبلی نے کہاکہ 11 اور 12 جون کو قومی اسمبلی کا اجلاس نہیں ہوگا،13 جون کو قومی اسمبلی میں وفاقی بجٹ پر بحث کا آغاز ہوگا۔ انہوںنے کہاکہ قومی اسمبلی میں موجود پارلیمانی جماعتوں کو قواعد و ضوابط کے مطابق بحث کیلئے وقت دیا جائے گا۔ انہوںنے کہاکہ وفاقی بجٹ پر بحث 21 جون تک جاری ہے گی۔ انہوںنے کہاکہ وفاقی بجٹ 2025-26 پر بجٹ 21 جون کو سمیٹی جائے گی،22 جون کو قومی اسمبلی کا اجلاس نہیں ہو گا۔

انہوںنے کہاکہ 23 جون کو قومی اسمبلی میں 2025- 26 کے مختص کردہ ضروری اخراجات پر بحث ہوگی،24 اور 25 جون کو ڈیمانڈز،گرانٹس،کٹوتی کی تحاریک پر بحث اور ووٹنگ ہوگی۔ انہوںنے کہاکہ 26 جون کو فنانس بل کی قومی اسمبلی سے منظوری ہوگی ،27 جون کو سپلیمنٹری گرانٹس سمیت دیگر امور پر بحث اور ووٹنگ ہوگی۔