بڑھتی عدم رواداری اور نفرت کو مکالمے اور مفاہمت سے قابو کریں، گوتیرش

یو این بدھ 11 جون 2025 04:00

اسلام آباد (اُردو پوائنٹ ۔ UN اردو۔ 11 جون 2025ء) اقوام متحدہ کے سیکرٹری جنرل انتونیو گوتیرش نے کہا ہے کہ دنیا میں عدم رواداری اور نفرت بڑھ رہی ہے جس پر قابو پانے کے لیے بات چیت کے ذریعے مفاہمت اور اعتماد کو فروغ دینا ہو گا۔

تہذیبوں کے مابین مکالمے کے پہلے عالمی دن پر اپنے پیغام میں ان کا کہنا ہے کہ اقوام متحدہ کی بنیاد اس بنیادی یقین پر رکھی گئی تھی کہ گفت و شنید ہی امن کا راستہ ہے۔

آج یہ مقصد پہلے سے کہیں زیادہ اہم ہو گیا ہے۔ جہاں مکالمہ نہیں ہوتا وہاں یہ خلا جہالت پُر کرتی ہے۔

یہ دن اسی یقین اور تہذیبوں کے زرخیز تنوع کے اعتراف کا موقع ہے جو باہمی مفاہمت اور عالمگیر یکجہتی کو فروغ دینے کی قوت ہیں۔

تہذیبوں کے اتحاد کی اہمیت

سیکرٹری جنرل نے کہا ہے کہ آن لائن پھیلائی جانے والی غلط اطلاعات اور اظہار نفرت نے عدم رواداری کو تقویت دی ہے۔

(جاری ہے)

اس مسئلے سے نمٹںے کے لیے اقوام متحدہ کے تہذیبوں کے اتحاد کا کام بہت اہم ہے جسے اس کی جانب سے گزشتہ دو دہائیوں میں مکالمے کے لیے قائم کردہ عالمگیر پلیٹ فارم سے تقویت ملی ہے۔

دنیا بھر کے لوگوں کو چاہیے کہ وہ ایک انسانی خاندان بننے کی کوشش کریں جو تنوع سے مالا مال ہو، یکجہتی کے ذریعے متحد ہو اور جو مساوی وقار اور انسانی حقوق کا حامل ہو۔

انہوں ںے کہا ہے کہ یہ عالمی دن سننے، بولنے اور رابطہ کرنے کی پکار ہے۔ امن و آشتی کی خاطر نفرت کا جواب انسانیت سے دینا ہو گا۔ ایک دوسرے کی بات کھلے دل اور کھلے دماغ سے سننا ہو گی اور بات چیت کو تقسیم پر ترجیح دینا ہو گی۔