Live Updates

اتحاد ایئرویز کا کراچی کے لیے یومیہ چار پروازوں کا اعلان، پاکستان کے لیے ہفتہ وار پروازوں کی تعداد 60 تک پہنچ گئی

بدھ 11 جون 2025 20:53

ابوظہبی (اُردو پوائنٹ اخبارتازہ ترین - اے پی پی۔ 11 جون2025ء) اتحاد ایئرویز نے کراچی کے لیے یومیہ چار پروازیں شروع کرنے کا اعلان کیا ہے جس سے پاکستان کے لیے ہفتہ وار پروازوں کی تعداد 60 تک پہنچ گئی۔امارات نیوز ایجنسی وام کے مطابق اتحاد ایئرویز نے کراچی، پاکستان کے لیے اپنی پروازوں کی تعداد میں مزید اضافہ کر دیا ہے، اور اس توسیع کے تحت فضائی سفر کے لیے ٹکٹوں کی دستیابی کا آغاز ہو چکا ہے۔

ایئرلائن کے اعلامیہ کے مطابق، یہ اقدام مہمانوں کو زیادہ سفری سہولیات اور عالمی سطح پر بہتر رابطے فراہم کرنے کے عزم کی ایک کڑی ہے۔ترجمان کے مطابق، یکم اکتوبر 2025 سے اتحاد ایئرویز ابوظہبی سے کراچی کے لیے یومیہ چار پروازیں شروع کرے گی، جس کے بعد پاکستان کے اقتصادی مرکز کے لیے ہفتہ وار نان سٹاپ پروازوں کی تعداد 28 ہو جائے گی۔

(جاری ہے)

بیان میں کہا گیا کہ نئی پروازوں کا شیڈول مسافروں کی سہولت کو مدنظر رکھتے ہوئے ترتیب دیا گیا ہے، تاکہ وہ نہ صرف متحدہ عرب امارات بلکہ مشرق وسطیٰ، افریقہ، یورپ اور شمالی امریکہ کے لیے بھی بآسانی سفر کر سکیں۔

اتحاد ایئرویز کی جانب سے اس توسیع کے بعد پاکستان کے لیے مجموعی ہفتہ وار پروازوں کی تعداد 60 ہو گئی ہے۔ترجمان نے مزید بتایا کہ یہ اعلان ان حالیہ اقدامات کا تسلسل ہے، جن کے تحت پشاور کے لیے نئی پروازوں کے آغاز کی اطلاع دی گئی ہے۔ پشاور کے لیے پروازوں کا آغاز 29 ستمبر سے متوقع ہے، جس سے پاکستان اور ابوظہبی کے درمیان فضائی روابط مزید مستحکم ہوں گے۔