بھارتی طیارے کے مسافروں کی تفصیلات سامنے آگئیں، سابق وزیراعلیٰ گجرات بھی سوار تھے

طیارے پر مجموعی طور پر 242 افراد سوار تھے، زخمی ہونے والے افراد کو فوری قریبی ہسپتالوں میں منتقل کردیا گیا

ساجد علی جمعرات 12 جون 2025 15:38

بھارتی طیارے کے مسافروں کی تفصیلات سامنے آگئیں، سابق وزیراعلیٰ گجرات ..

احمد آباد ( اُردو پوائنٹ اخبارتازہ ترین۔ 12 جون 2025ء ) احمد آباد میں حادثے کے شکار بھارتی طیارے کے مسافروں کی تفصیلات سامنے آگئیں، سابق وزیراعلیٰ گجرات بھی سوار تھے۔ بھارتی میڈیا اور ایئر انڈیا کے مطابق حادثے کا شکار ہونے والے طیارے پر سوار مسافروں میں 169 بھارتی اور 53 برطانوی شہری سوار تھے، مسافروں میں پرتگال کے 7 اور کینیڈا کا ایک شہری بھی شامل ہے، طیارے پر مجموعی طور پر 242 افراد سوار تھے جن میں دو پائلٹ اور عملے کے 10 اراکین شامل ہیں، اس کے علاوہ سابق وزیراعلیٰ گجرات وجے روپانی بھی ایئر انڈیا کی اس بدقسمت پرواز میں سوار تھے، طیارہ حادثے میں زخمی ہونے والے افراد کو فوری قریبی ہسپتالوں میں منتقل کردیا گیا۔

بتایا جارہا ہے کہ بھارتی ایئرلائن کا مسافر طیارہ لندن کی پرواز کے کچھ ہی دیر کے بعد احمد آباد میں گر کر تباہ ہوگیا، ٹیک آف کے دوران احمد آباد کے بین الاقوامی ہوائی اڈے کے قریب ایئر انڈیا کی احمد آباد سے لندن کی پرواز کو حادثہ پیش آیا، یہ واقعہ معمول کی پرواز کے دوران پیش آیا جس کے فوری بعد علاقے میں ہنگامی حالت نافذ کردی گئی اور ریسکیو ادارے فوری جائے وقوعہ پر پہنچ گئے۔

(جاری ہے)

معلوم ہوا ہے کہ اس واقعے کی اطلاع ملتے ہی احمد آباد فائر اینڈ ایمرجنسی سروسز ڈیپارٹمنٹ نے آگ بجھانے والی پانچ سے زیادہ گاڑیاں حادثے کے مقام پر پہنچادیں، حکام نے تصدیق کی ہے کہ حادثہ کا الرٹ جاری ہونے کے بعد فائر ٹینڈرز کو تیزی سے متحرک کیا گیا، جس کے بعد ہنگامی ٹیمیں مسلسل امدادی ردعمل اور تشخیصی کارروائیوں میں مصروف ہیں۔ فائر ڈپارٹمنٹ کے ایک سینیئر اہلکار نے بتایا کہ "مختلف سٹی ڈویژنوں سے پانچ سے زیادہ فائر گاڑیوں کی ایک ٹیم مقام پر پہنچ چکی ہے، آگ پر قابو پانے کے اقدامات احتیاط کے طور پر کیے جا رہے ہیں"، واقعے کی وجہ اور طیارے کو پہنچنے والے نقصان کی تاحال سرکاری طور پر تصدیق نہیں ہوسکی تاہم ہوائی اڈے کے حکام نے اندرونی انکوائری شروع کر دی ہے جب کہ ایک تکنیکی ٹیم صورتحال کا جائزہ لے رہی ہے۔