Live Updates

وزیر اعلیٰ کے معاونِ خصوصی ڈاکٹر شفقت ایاز اور مشیر صحت خیبرپختونخوا احتشام علی کا حمزہ فاؤنڈیشن ویلفیئر ہسپتال پشاور کا دورہ

جمعرات 12 جون 2025 20:25

پشاور(اُردو پوائنٹ اخبارتازہ ترین - این این آئی۔ 12 جون2025ء)ورلڈ بلڈ ڈونر ڈے کے موقع پر خیبرپختونخوا حکومت کی نمائندگی کرتے ہوئے معاونِ خصوصی برائے سائنس و آئی ٹی ڈاکٹر شفقت ایاز اور مشیر صحت احتشام علی نی حمزہ فاؤنڈیشن ویلفیئر ہسپتال پشاور کا خصوصی دورہ کیا۔ اس موقع پر ہسپتال کے بانی رکن اور ڈاکٹروں کی جانب سے انہیںہسپتال کے انتظامی ڈھانچے، جاری فلاحی خدمات، اور عطیہ خون کے نظام سے متعلق تفصیلی بریفنگ دی گئی۔

ہسپتال انتظامیہ کی جانب سے ایک مختصر مگر جامع پریزنٹیشن کے ذریعے مہمانوں کو آگاہ کیا گیا کہ کس طرح حمزہ فاؤنڈیشن تھلیسیمیا سمیت دیگر موذی امراض کے خلاف سرگرمِ عمل ہے اور عطیہ دہندگان کے تعاون سے مستحق مریضوں کو مسلسل علاج و معالجے کی سہولیات فراہم کی جا رہی ہیں۔

(جاری ہے)

دورے کے دوران معزز مہمانوں نے ہسپتال میں زیرِ علاج مریضوں، خصوصاً بچوں سے ملاقات کی، ان کا حال احوال دریافت کیا اور ان میں تحائف تقسیم کیے۔

معاونِ خصوصی ڈاکٹر شفقت آیاز اور احتشام علی نے ہسپتال انتظامیہ کی خدمات کو سراہتے ہوئے کہا کہ ایسے ادارے معاشرے کے لیے امید کی کرن ہوتے ہیں اور حکومت ایسے فلاحی اداروں کی ہر ممکن معاونت جاری رکھے گی اور چیئرمین عمران خان اور وزیر اعلیٰ علی امین خان گنڈاپور کے وژن کے تحت صحت کارڈ کے ذریعے جلد تھیلیسیمیا کا مفت علاج فراہم کیا جائے گا۔