افغانستان میں سیلاب سے 3 افراد جاں بحق

100 سے زائد رہائشی مکانات مکمل یا جزوی طور پر تباہ ،متعدد مویشی بھی بہہ گئے

جمعہ 13 جون 2025 16:42

کابل(اُردو پوائنٹ اخبارتازہ ترین - این این آئی۔ 13 جون2025ء)افغانستان کے شمالی صوبے بدخشان میں شدید بارشوں کے بعد آنے والے طوفانی سیلاب سے 3افراد جاں بحق ہو گئے، جبکہ بڑی تعداد میں املاک کو نقصان پہنچا ہے۔

(جاری ہے)

امریکی ٹی وی کے مطابق صوبائی آفاتِ سماوی انتظامیہ کے ڈائریکٹر مولوی محمد اکرم اکبری نیبتایا کہ سیلاب نے جرم، وردوج، راغستان اور ارغنجخواہ کے اضلاع کو بری طرح متاثر کیا، جہاں 100 سے زائد رہائشی مکانات مکمل یا جزوی طور پر تباہ ہو گئے، جب کہ متعدد مویشی بھی بہہ گئے۔

سیلاب کے باعث سینکڑوں ایکڑ زرعی اراضی، سڑکیں، پل اور دیگر بنیادی ڈھانچے بھی متاثر ہوئے۔ دوسری جانب، صوبے کے تیشکن، خاش اور تگاب اضلاع میں بھی گزشتہ چار دنوں سے جاری موسلا دھار بارشوں کے نتیجے میں اچانک آنے والے سیلاب نے بہت نقصان پہنچایا ہے۔افغان محکمہ موسمیات نے آئندہ دنوں میں مزید بارشوں کی پیشنگوئی کرتے ہوئے خبردار کیا ہے کہ متاثرہ اور کمزور علاقوں میں مزید سیلاب آنے کا خدشہ ہے۔