Live Updates

حکومت بلوچستان کا پاکستان ریلویز کے تعاون سے پیپلز ٹرین چلانے کا فیصلہ

جمعہ 13 جون 2025 17:30

کوئٹہ (اُردو پوائنٹ اخبارتازہ ترین - اے پی پی۔ 13 جون2025ء) حکومت بلوچستان نے پاکستان ریلویز کے تعاون سے پیپلز ٹرین سریاب اور کچلاک کے درمیان چلانے کا فیصلہ کر لیا۔یہ فیصلہ وزیراعلیٰ بلوچستان میرسرفرازبگٹی کی زیر صدارت اجلاس میں ہوا۔اجلاس میں پارلیمانی سیکرٹری ٹرانسپورٹ میرلیاقت لہڑی ،صوبائی مشیر مینا مجید بلوچ، چیف سیکرٹری شکیل قادر خان ،ایڈیشنل چیف سیکرٹری ترقیات حافظ عبدالباسط ،سیکرٹری ٹرانسپورٹ حیات کاکڑ،سیکرٹری سی این ڈبلیو لعل جان جعفر، وزیراعلیٰ کے پرنسپل سیکرٹری بابر خان ،ڈپٹی کمشنر کوئٹہ کیپٹن(ر)مہراللہ بادینی ودیگر بھی موجود تھے ۔

اجلاس میں فیصلہ کیاگیاکہ پاکستان ریلویز کے تعاون سے پیپلز ٹرین چلایاجائے گا پیپلز ٹرین سریاب اور کچلاک کے درمیان چلے گی۔

(جاری ہے)

پاکستان ریلویز کے پانچ پرانے اسٹیشن اپ گریڈ، دو نئے اسٹیشن تعمیر کیے جائیں گے، پاکستان ریلویز کا ٹریک اپ گریڈ کر کے ٹرین کی رفتار بڑھائی جائے گی، پاکستان ریلویز اور محکمہ ٹرانسپورٹ بلوچستان منصوبے کو قابلِ عمل بنانے کے لیے اقدامات کریں گے۔

وزیراعلیٰ بلوچستان میرسرفرازبگٹی نے کہاکہ پیپلز ٹرین سروس سے کوئٹہ اور گرد و نواح کے عوام کو آرام دہ و معیاری سفری سہولیات میسر آئیں گی، یہ منصوبہ عوامی سہولت، سستی ٹرانسپورٹ اور جدید سفری نظام کے خواب کی تعبیر ہے، کوئٹہ کے شہریوں کو روزانہ کی آمد و رفت میں آسانی اور وقت کی بچت حاصل ہوگی۔ریلوے اسٹیشنز کو جدید سہولیات سے آراستہ کر کے شہریوں کے لیے محفوظ اور باوقار ماحول یقینی بنایا جائے گا، حکومت بلوچستان ٹرانسپورٹ کے شعبے میں عوام دوست اور دیرپا منصوبے لارہی ہے، پیپلز ٹرین سروس ترقی کی جانب پہلا قدم ہے، جلد مزید اقدامات اٹھائے جائیں گے۔