Live Updates

راولپنڈی ،کانسٹیبل کو قتل کرنے والا دوسرا ڈکیت بھی مبینہ پولیس مقابلہ میں ہلاک

جمعہ 13 جون 2025 18:25

راولپنڈی (اُردو پوائنٹ اخبارتازہ ترین - اے پی پی۔ 13 جون2025ء) راولپنڈی کے تھانہ صدر واہ کی حدود میں فائرنگ سے کانسٹیبل کو قتل کرنے والا دوسرا ڈکیت بھی مبینہ پولیس مقابلہ میں ہلاک ہوگیا ۔پولیس ترجمان کے مطابق گزشتہ روز پولیس کانسٹیبل سید سجاد حسین شہید پر فائرنگ میں ملوث ایک اور ڈاکو پولیس مقابلہ کے دوران ہلاک ہو گیا،ہلاک ڈاکو سے اسلحہ اور ٹیکسلا کے علاقے سے کچھ دن قبل گن پوائنٹ پرچھینا گیا موٹرسائیکل برآمد ہوا۔

صدر واہ کے علاقہ میں خطرناک ڈکیتوں نے رات گئے سی سی ڈی اور صدر واہ پولیس پارٹی پر فائرنگ کی۔ فائرنگ کے دوران ایک ڈاکو ہلاک جبکہ ایک فرار ہو گیا،فائرنگ کے دوران ایک فائر کانسٹیبل مختیار حیدر کو چھاتی پر لگا جو بلٹ پروف جیکٹ کے وجہ سے محفوظ رہے۔

(جاری ہے)

ہلاک ڈاکو کی شناخت قدرت اللہ کے نام سے ہوئی جو افغان شہریت رکھتا تھا، ہلاک ڈاکو سنگین مقدمات سمیت ڈکیتی کی بیسیوں وارداتوں میں ریکارڈ یافتہ و مطلوب تھا، ہلاک ڈاکو گزشتہ روز پولیس کانسٹیبل سید سجاد حسین شہید پر فائرنگ میں بھی ملوث تھا، گزشتہ روز پولیس کانسٹیبل سید سجاد حسین کی شہادت کے بعد فرار ملزمان کو گرفتار کرنے کے لئے سی سی ڈی سمیت پولیس ٹیموں کو خصوصی ٹاسک دیا گیا تھا، ناکہ بندی کے دوران مشکوک موٹر سائیکل سواروں کو روکا گیا جنہوں نے پولیس پارٹی پر فائرنگ شروع کر دی،ہلاک ڈاکو اور اس کے ساتھی کے زیر استعمال برآمد ہونے والاموٹر سائیکل مقدمہ نمبر1296مورخہ 11-06-2025تھانہ ٹیکسلا میں پولیس کو مطلوب تھاجو کہ ڈاکوؤں نے شہری سے گن پوائنٹ پر چھینا تھا۔

واقعہ کی اطلاع پر سینئر پولیس افسران موقع پر پہنچ گئے، فرار ڈاکو کی گرفتاری کے لیے علاقہ میں سرچ آپریشن کیا گیا، خطرناک ڈاکوئوں کی فائرنگ کے باوجود بہادری سے مقابلہ کرنے پر سی پی او سید خالد ہمدانی نے ایس ایس پی سی سی ڈی، ایس پی پوٹھوہار، ایس ڈی پی او ٹیکسلا، سی سی ڈی اور پولیس ٹیموں کو شاباش دیتے ہوئے کہا کہ شہریوں کی جان و مال اور پولیس حملہ کرنے والے قانون کی گرفت سے نہیں بچ سکتے۔