زندگی بچانے والی دوا کی گمراہ کن تشہیر پر دواساز کمپنی پر 20 لاکھ روپے جرمانہ؛ ٹربیونل نے سی سی پی کا فیصلہ برقرار رکھنے کا حکم

اسلام آباد(اُردو پوائنٹ اخبارتازہ ترین - آن لائن۔ 13 جون2025ء)مسابقتی کمیشن آف پاکستان کے ایک اہم فیصلے کو برقرار رکھتے ہوئے، کمپٹیشن اپیلیٹ ٹربیونل نے ایک دوا ساز کمپنی کی جانب سے گردوں کے مریضوں کے لیے استعمال ہونے والی اہم دوا کی گمراہ کن تشہیر پر عائد سزا کو جائز قرار دیتے ہوئے کمیشن کے فیصلہ کو برقرار رکھ نے کا حکم دیا ہے۔ٹربیونل نے فارماسیوٹیکل کمپنی،3N لائف میڈ کی اپیل خارج کرتے ہوئے کمپٹیشن کمیشن کے الزامات اور جرمانے کو برقرار رکھنے کا ھکم دیا۔

تاہم کمپنی کی درخواست پر، کمپنی کی مالی حالت کو مدنظر رکھتے ہوئے جرمانہ کم کرکے 20 لاکھ روپے کر دیا۔ تاہم، ٹربیوںل نے فارما سیٹیکل کمپنی کو جرمانہ دس دن کے اندر جمع کرانے کا حکم دیا اور تعمیل نہ ہونے پر ہر دن کی تاخیر پر ایک لاکھ روپے یومیہ اضافی جرمانہ عائد ہوگا۔

(جاری ہے)

واضح رہے کہ کمپٹیشن کمیشن نے ایک دوسری فارمیسٹیکل کمپنی رینا کون فارما لمیٹڈ کی شکایت پر انکوائری کی تھی۔

کمیشن کو موصول شکایت میں الزام لگایا گیا تھا کہ 3N لائف میڈ کمپنی، بین الاقوامی اسٹینڈرڈز کی جعلی سندیں استعمال کرکے، گردوں کے مریضوں کیڈایلیس کے لئے استعمال ہونے والی دوا، ہیمو ڈائلیسس کنسنٹریٹ فروخت کر رہی ہے، جو گردوں کے فیل مریضوں کے لیے زندگی بچانے والی دوا تصور کی جاتی ہے۔سی سی پی کی تحقیقات میں ثابت ہوا کہ کمپنی نے بین الاقوامی اسٹینڈرڈ Conformit: Europ:ene (CE) اور Quality Management System (QMS) کے جعلی سرٹیفکیٹس استعمال کیے۔

یہ سرٹیفیکیٹ اسلام آباد میں قائم ایک غیرتسلیم شدہ ادارے SIMS-AGS سے حاصل کیے گئے تھے۔ اگرچہ یہ سرٹیفکیٹس پاکستان میں لازمی نہیں ہیں، تاہم انہیں معیار کی ضمانت اور سرکاری خریداریوں میں بنیادی شرط سمجھا جاتا ہے۔کمپنی کی جانب سے جھوٹی تشہیر نے اسپتالوں اور مریضوں کو اس غلط فہمی میں مبتلا کیا کہ دوا عالمی معیار پر پورا اترتی ہے، جبکہ حقیقت اس کے برعکس تھی۔

ہیمو ڈائلیسس کنسنٹریٹ کو ڈرگ ریگولیٹری اتھارٹی آف پاکستان (ڈریپ) نے طبی آلہ قرار دیا ہے، جس کے ذریعے ڈائلیسس کے دوران مریض کے خون کے الیکٹرولائٹ اور ایسڈ بیس توازن کو برقرار رکھا جاتا ہے۔سماعت کے دوران کمپنی کے وکیل نے مؤقف اختیار کیا کہ کمیشن کی جانب سے شوکاز نوٹس موصول ہونے کے بعد سے CE اور QMS مارکنگ والی کوئی نئی بیچ تیار نہیں کی گئی، اور ان کی دوا ڈریپ سے منظور شدہ ہے۔

ساتھ ہی، انہوں نے ساری ذمہ داری SIMS-AGS پر ڈالنے کی کوشش کی۔تاہم، کمپٹیشن کمیشن کے وکیل نے مؤقف اختیار کیا کہ 3N لائف میڈ ایک دوا ساز کمپنی ہے اور اسے معلوم ہونا چاہیے تھا کہ ایسی سندیں خریدی نہیں جا سکتیں بلکہ معیار اور پیداوار کے سخت معائنے کے بعد دی جاتی ہیں۔ ٹربیونل نے کمیشن کا مؤقف تسلیم کیا کہ اگرچہ یہ سندیں قانونی طور پر لازمی نہیں، مگر ان کا جھوٹا استعمال صارفین کے اعتماد کے ساتھ دھوکہ دہی کے مترادف ہے۔