Live Updates

مدینہ منورہ میں گمشدہ اور ملنے والے سامان کی 100 فیصد شکایات حل ،شکایت سیل

ہفتہ 14 جون 2025 17:38

مدینہ المنورہ (اُردو پوائنٹ اخبارتازہ ترین - اے پی پی۔ 14 جون2025ء) شکایات سیل نے مدینہ منورہ میں گمشدہ ، ملنے والے سامان اور ذاتی اشیاء کے حوالے سے حجاج کی طرف سے درج کرائی گئی شکایات کو 100 فیصد کامیابی سے حل کر دیا ہے۔ہفتہ کو یہاں ’’اے پی پی ‘‘سے گفتگو کرتے ہوئے لاسٹ اینڈ فاؤنڈ سیل کے انچارج الیاس جعفر نے بتایا کہ حجاج کرام کی جانب سے اپنے سامان کے گمشدگی کی کل 175 شکایات موصول ہوئی ہیں۔

ان میں سے 158 شکایات دفتر میں جمع کروائی گئیں جبکہ 17 حج ایپ کے ذریعے درج کی گئیں۔انہوں نے کہا کہ الحمدللہ، اللہ تعالی کے فضل و کرم سے 100 فیصد شکایات کا ازالہ ہو چکا ہے اور کوئی شکایت زیر التوا نہیں ہے۔انہوں نے کہا کہ سیل دو شفٹوں میں چوبیس گھنٹے کام کرتا ہے اور صبح اور رات کی شفٹوں میں دو ٹیمیں ہوتی ہیں۔

(جاری ہے)

انہوں نے مزید کہا کہ ہمارے پاس گمشدہ سامان اور اشیاء کو تلاش کرنے اور متعلقہ حاجیوں کو واپس کرنے کے لیے ایک جدید طریقہ کار موجود ہے۔

انہوں نے کہا کہ ہماری ٹیمیں مکہ مکرمہ سے آنے والے ٹرکوں سے سامان اتارنے کے دوران موجود تھیں اور سامان کی فوری ہینڈلنگ کو یقینی بنایا۔ انہوں نے کہا کہ سیل نے گزشتہ روز عازمین کو 7 بیگ بھی کامیابی کے ساتھ واپس کیے جو حج سے قبل ہی گم ہو گئے تھے۔الیاس جعفر نے کہا کہ کچھ عازمین اپنے سامان پر اپنا نام یا پاسپورٹ نمبر بتانے میں ناکام رہے اور پاکستان میں وزارت کی طرف سے انہیں فراہم کردہ بیگز کا استعمال کیا گیا تھا جس سے شناخت مزید مشکل بن گئی تھی۔ ایک سوال کے جواب میں انہوں نے بتایا کہ متعلقہ بلڈنگ ڈیوٹی آفیسرز کے ذریعے یا براہ راست فون کے ذریعے +966-593624876 / +966-582874014 یا 0092-3700037428 / 3700037429 پر واٹس ایپ پر شکایات درج کی جا سکتی ہیں۔