دریا بچائو تحریک کے کنوینر سید زین شاہ کے اعزاز میں سندھ یونائیٹڈ پارٹی انٹرنیشنل کی جانب سے جدہ میں استقبالیہ تقریب

آپ کی آگاہی، دلچسپی اور حصہ داری سندھ کے حقوق کی جدوجہد میں اہم کردار ادا کر سکتی ہے، سید زین شاہ

ہفتہ 14 جون 2025 18:19

جدہ(اُردو پوائنٹ اخبارتازہ ترین - این این آئی۔ 14 جون2025ء) دریا بچائو تحریک کے کنوینر اور سندھ یونائیٹڈ پارٹی کے مرکزی صدر سید زین شاہ کے اعزاز میں سندھ یونائیٹڈ پارٹی انٹرنیشنل کی جانب سے جدہ میں ایک شاندار استقبالیہ تقریب کا انعقاد کیا گیا، جس میں جدہ سمیت آس پاس کے شہروں سے بڑی تعداد میں سندھی برادری نے بھرپور شرکت کی۔یہ استقبالیہ اوورسیز سندھیوں کی جانب سے سید زین شاہ سے اپنی بے پناہ محبت، اعتماد اور وابستگی کا اظہار تھا۔

پروگرام میں جدہ کی ممتاز علمی، سماجی اور سیاسی شخصیات جن میں ڈاکٹر برکت نوناری، ڈاکٹر محمد خان میمن، اللہ داد بگھیو، سہیل جمالی، منظور لنڈ، الیاس صدیقی، ماجد چانڈیو، اشرف بگھیو سمیت کئی سندھ دوستوں نے بڑی دلچسپی سے شرکت کی۔

(جاری ہے)

سید زین شاہ نے استقبالیہ سے خطاب کرتے ہوئے دریائے سندھ پر ہونے والی ناانصافیوں، پانی کی قلت، سندھ کے وسائل پر قبضوں، سندھ اور وفاقی حکومت کی جانب سے ہونے والی زیادتیوں، اور سندھ کی سماجی، اقتصادی و سیاسی صورتحال پر تفصیل سے روشنی ڈالی۔

انہوں نے اوورسیز سندھیوں کو صورتحال سے آگاہ کرتے ہوئے کہا کہ آپ کی آگاہی، دلچسپی اور حصہ داری سندھ کے حقوق کی جدوجہد میں اہم کردار ادا کر سکتی ہے۔سید زین شاہ نے کہا کہ سندھ کا نوجوان طبقہ، چاہے وہ ملک کے اندر ہو یا بیرون ملک، اپنی دھرتی سے جو بے لوث محبت رکھتا ہے، وہ امیدوں کا ایک نیا چراغ روشن کرتا ہے۔ انہوں نے کہا کہ دریاں، پانی اور وسائل کی ملکیت کے لیے سندھ یونائیٹڈ پارٹی کسی بھی قربانی سے دریغ نہیں کرے گی۔

پروگرام کے اختتام پر شاندار میزبانی کرنے والے منتظمین واجد گاڈہی، فیروز ببر، بشیر آریسر اور ان کے ساتھیوں کا خصوصی طور پر شکریہ ادا کیا گیا۔ اس موقع پر اوورسیز سندھیوں کی جانب سے سید زین شاہ کو سندھی ثقافت کی علامت، پگڑی (پو) اور اجرک پہنائی گئی، جو ان کی والہانہ محبت اور عقیدت کا علامتی اظہار تھا۔