ڈونلڈ ٹرمپ نے بھارت پر مزید 25 فیصد ٹیرف عائد کردیا

امریکا کی جانب سے بھارت کی مصنوعات پر عائد کیا گیا ٹیرف مجموعی طور پر 50 فیصد ہو گیا

muhammad ali محمد علی بدھ 6 اگست 2025 20:24

ڈونلڈ ٹرمپ نے بھارت پر مزید 25 فیصد ٹیرف عائد کردیا
واشنگٹن (اُردو پوائنٹ اخبارتازہ ترین۔ 06 اگست2025ء) ڈونلڈ ٹرمپ نے بھارت پر مزید 25 فیصد ٹیرف عائد کردیا، امریکا کی جانب سے بھارت کی مصنوعات پر عائد کیا گیا ٹیرف مجموعی طور پر 50 فیصد ہو گیا۔ تفصیلات کے مطابق امریکی صدر ٹرمپ نے بھارت پر عائد 25 فیصد ٹیرف میں مزید 25 فیصد اضافہ کردیا۔ بھارت پر اب مجموعی امریکی ٹیرف پچاس فیصد ہوگیا۔ وائٹ ہاؤس سے جاری بیان میں کہا گیا ہے کہ امریکی صدر ٹرمپ نے بھارت کی جانب سے روس کے تیل کی خریداری جاری رکھنے پر مزید 25 فیصد ٹیرف عائد کیا ہے۔

بیان میں کہا گیا ہے کہ ٹرمپ نے بھارت پر مزید 25 فیصد ٹیرف کے ایگزیکٹو آرڈر پر دستخط بھی کردیے۔ نیا اضافی ٹیرف 27 اگست سے نافذالعمل ہوگا۔ ٹرمپ نے اپنی پوسٹ میں بھارت کو دنیا کے سب سے زیادہ ٹیرف لگانے والے ممالک میں سے ایک قرار دیا اور کہا کہ بھارت نے غیر مالیاتی تجارتی رکاوٹیں بھی عائد کی ہوئی ہیں جو امریکی مفادات کے خلاف ہیں۔

(جاری ہے)

صدر ٹرمپ نے بھارت پر روس سے دفاعی سازوسامان اور توانائی خریدنے پر بھی تشویش کا اظہار کیا اور کہا کہ بھارت روس کا سب سے بڑا توانائی خریدار ہے، جو عالمی پابندیوں کی خلاف ورزی ہے۔

انہوں نے واضح کیا کہ اس کے علاوہ بھارت پر ٹیرف کے ساتھ اضافی جرمانہ بھی عائد کیا جائے گا۔ امریکی میڈیا کے مطابق امریکی صدر نے روس سے تیل خریدنے والے ممالک پر مزید ٹیرف لگانے کی دھمکی بھی دی ہے۔ امریکی صدر ڈونلڈ ٹرمپ نے بھارت پر اضافی 25 فیصد ٹیرف عائد کرنے کے بعد کہا ہے کہ روس سے تیل کی خریداری بند نہ کی تو مزید ٹیرف لگے گا۔ روس سے تجارت کرنے اور تیل خریدنے والے ممالک پر 500 فیصد تک ٹیرف بھی عائد کر سکتے ہیں۔