سیدناعثمان غنیؒ کے یوم شہادت پر پانی کا صدقہ مہم کا آغاز

کراچی (اُردو پوائنٹ اخبارتازہ ترین - این این آئی۔ 14 جون2025ء) پاک امن ویلفیئر ایسوسی ایشن کے چیئرمین سعید احمد بیگ کی زیرِ سرپرستی حضرت عثمان غنیؓ کی شہادت کے بابرکت دن پر ''پانی کا صدقہ'' مہم کا باضابطہ آغاز کر دیا گیا ہے۔ اس فلاحی مہم کا بنیادی مقصد کراچی کے ان پسماندہ اور محروم بستیوں تک صاف پانی کی فراہمی ممکن بنانا ہے جہاں لوگ آج بھی ایک گھونٹ میٹھے پانی کو ترستے ہیں، اور روزمرہ زندگی میں شدید مشکلات کا سامنا کر رہے ہیں۔

مہم کے ابتدائی مرحلے میں شہر کے مختلف غریب اور نظر انداز شدہ علاقوں جیسے سرجانی ٹاؤن، خدا کی بستی، تیسر ٹاؤن، اورنگی ٹاؤن، کورنگی، لیاری اور لیاری ایکسپریس وے کے اطراف کی کچی آبادیوں میں روزانہ کی بنیاد پر واٹر ٹینکرز فراہم کیے جا رہے ہیں، تاکہ فوری طور پر ان کی بنیادی ضرورت پوری کی جا سکے۔

(جاری ہے)

ان علاقوں میں نہ صرف حکومتی سطح پر پانی کی شدید قلت پائی جاتی ہے بلکہ وہاں کے باسی کئی کئی دن پانی کے انتظار میں گزارنے پر مجبور ہیں۔

تنظیم کی جانب سے اس مہم کو صرف عارضی ریلیف تک محدود نہیں رکھا گیا بلکہ مستقبل میں پائیدار حل کے لیے ''پانی کی بورنگ'' جیسے منصوبے بھی شروع کیے جا رہے ہیں۔ بعض مقامات پر ہینڈ پمپ، کنویں یا بورنگ کے ذریعے مستقل بنیادوں پر پانی کی دستیابی ممکن بنانے کے لیے انجینئرنگ ٹیمیں اور سروے عملہ سرگرمِ عمل ہے۔ یہ اقدام نہ صرف پانی کی قلت کا دیرپا حل ہے بلکہ مقامی آبادی کو خود کفیل بنانے میں بھی مددگار ثابت ہو گا۔

اس موقع پر چیئرمین سعید احمد بیگ نے کہا کہ حضرت عثمان غنی رضی اللہ عنہ نے مدینہ کے پیاسے لوگوں کے لیے بئرِ رومہ کا کنواں خرید کر اللہ کی راہ میں وقف کیااور یوں جنت کے حقدار بن گئے۔ اُن کے اسی جذبہ ایثار اور سنت کو زندہ رکھنے کے لیے پاک امن ویلفیئر ایسوسی ایشن نے یہ مہم شروع کی ہے تاکہ ہم بھی آج کے دور میں ان عظیم مثالوں پر عمل کرتے ہوئے دنیا و آخرت سنوار سکیں۔

انہوں نے مزید کہا کہ صرف 3000 روپے کے عطیے سے ایک واٹر ٹینکر کسی بستی کو فراہم کیا جا سکتا ہے، جبکہ بورنگ کے لیے اجتماعی تعاون درکار ہے۔ ہر عطیہ نہ صرف کسی پیاسے کی زندگی میں آسانی پیدا کرتا ہے، بلکہ صدقہء جاریہ بن کر عطیہ دہندہ کے لیے ہمیشہ کے لیے نیکیوں کا ذریعہ بھی بن سکتا ہے۔ انہوں نے مخیر حضرات، فلاحی اداروں، کاروباری شخصیات اور عام شہریوں سے اپیل کی کہ وہ اس مہم میں بڑھ چڑھ کر حصہ لیں اور حضرت عثمان غنیؓ کی سنت پر چلتے ہوئے کسی پیاسے کو پانی مہیا کر کے اپنے لیے جنت کا راستہ ہموار کریں۔

پاک امن ویلفیئر ایسوسی ایشن نے اس مہم کے لیے باقاعدہ رابطہ نمبرز، عطیات جمع کرنے کے اکاؤنٹس اور رضاکاروں کا نیٹ ورک بھی قائم کیا ہے تاکہ عطیات کی منتقلی شفاف، تیز اور مؤثر ہو۔ جلد ہی بورنگ اور ہینڈ پمپ منصوبوں کی تصویری رپورٹس اور فیلڈ اپ ڈیٹس بھی عوام کے ساتھ شیئر کی جائیں گی تاکہ اعتماد اور شفافیت کو فروغ دیا جا سکے۔یہ مہم محض ایک فلاحی اقدام نہیں بلکہ انسانی ہمدردی، اسلامی تعلیمات، اور سماجی ذمے داری کا عملی اظہار ہے۔ ایسے میں ہر وہ شخص جو نیکی کی راہ کا خواہش مند ہے، اس کارِ خیر میں حصہ لے کر نہ صرف پیاس بجھا سکتا ہے بلکہ دعاؤں، برکتوں اور نجات کا مستحق بھی بن سکتا ہے۔