Live Updates

خیبر پختونخوا کا عوام دوست اور ترقیاتی بجٹ قابل تحسین ہے، محمد سہیل آفریدی

ہفتہ 14 جون 2025 20:10

پشاور(اُردو پوائنٹ اخبارتازہ ترین - این این آئی۔ 14 جون2025ء)وزیر اعلیٰ خیبر پختونخوا کے معاونِ خصوصی برائے مواصلات و تعمیرات محمد سہیل آفریدی نے مالی سال 2025-26 کے لیے صوبائی اسمبلی میں پیش کیے گئے 2119 ارب روپے کے بجٹ کو جامع، عوام دوست اور ترقیاتی وژن کا عکاس قرار دیا ہے۔ انہوں نے واضح کیا کہ بجٹ صرف پاکستان تحریک انصاف کے پیٹرن ان چیف عمران احمد خان نیازی سے منظوری کے بعد ہی پاس ہوگا، اگر خان صاحب سے ملاقات نہیں کروائی گئی یا ان کی منظوری نہیں آئی، تو صوبائی حکومت یہ بجٹ پاس نہیں کرے گی۔

انہوں نے کہا کہ موجودہ معاشی مشکلات اور چیلنجز کے باوجود حکومت خیبر پختونخوا نے جو بجٹ پیش کیا ہے، وہ ایک دور اندیشانہ اور متوازن دستاویز ہے، جو عوامی فلاح، بنیادی سہولیات کی فراہمی اور معاشی استحکام کے اہداف پر مرکوز ہے۔

(جاری ہے)

معاون خصوصی نے کم سے کم اجرت کو 36 ہزار روپے سے بڑھا کر 40 ہزار روپے کرنے کی تجویز کو مزدور طبقے کے لیے ایک حقیقی ریلیف قرار دیا، اور سرکاری ملازمین کی تنخواہوں میں 10 فیصد جبکہ پینشن میں 7 فیصد اضافے کو ایک احسن اور ہمدردانہ فیصلہ قرار دیا۔

محمد سہیل آفریدی نے کہا کہ مواصلات و تعمیرات کا محکمہ صوبے کی ترقی میں ریڑھ کی ہڈی کی حیثیت رکھتا ہے۔ ہم اپنی سڑکوں، پلوں اور دیگر انفراسٹرکچر کو جدید خطوط پر استوار کرنے کے لیے پرعزم ہیں۔ ان منصوبوں سے نہ صرف نقل و حمل کے نظام میں بہتری آئے گی بلکہ ہزاروں لوگوں کو روزگار کے مواقع بھی میسر آئیں گے۔انہوں نے مزید کہا کہ ترقیاتی بجٹ میں شامل منصوبے شہری اور دیہی دونوں علاقوں کو یکساں ترقی کے مواقع فراہم کریں گے، اور خیبر پختونخوا کو خوشحال، مربوط اور پائیدار ترقی کی راہ پر گامزن کریں گے۔سہیل آفریدی نے اس اُمید کا اظہار کیا کہ بجٹ میں شامل پالیسی فیصلے عوامی توقعات پر پورا اتریں گے اور ہر طبقے کو اس کے ثمرات جلد ملنا شروع ہو جائیں گے۔