’ایازصادق ایسی میراث چھوڑ کر جا رہے ہیں جس پر ان کی نسلیں بھی شرمندہ رہیں گی‘

اسلام آباد ( اُردو پوائنٹ اخبارتازہ ترین۔ 05 اگست 2025ء ) پاکستان تحریک انصاف کے رکن قومی اسمبلی شیخ وقاص اکرم کو ممکنہ طور پر ڈی سیٹ کیے جانے کے حوالے سے سابق وفاقی وزیر فواد چوہدری کا ردعمل آگیا۔ اس حوالے سے اپنے ایک بیان میں انہوں نے کہا کہ ایاز صادق ایک جمہوری شخص ہیں ذاتی طور پر بہت رکھ رکھاؤ والی شخصیت ہیں لیکن ان کا دور ایک سیاہ دور ہے جہاں ممبران اسمبلی کو پارلیمان کے اندر سے گرفتار کیا گیا، الیکشن کمیشن کو ممبران کو غیر آئینی طور پر ڈی سیٹ کرنے میں معاونت کی گئی اور اب وہ خود غیر حاضری کے بہانے جس کی وجہ انہیں معلوم ہے ایک ممبر کو ڈی سیٹ کررہے ہیں، وہ ایک ایسی میراث چھوڑ کر جا رہے ہیں کہ جس پر ان کی نسلیں بھی شرمندہ رہیں گی۔

بتایا جارہا ہے کہ قومی اسمبلی اجلاس کے دوران سپیکرقومی اسمبلی سردار ایاز صادق نے رولنگ دی کہ شیخ وقاص اکرم 40 روزسے مسلسل ایوان سے غیرحاضرہیں، اگرکوئی رکن چالیس دن تک غیرحاضررہے تو اس کے خلاف کوئی بھی رکن قومی اسمبلی نشست خالی قراردینے کی تحریک لاسکتا ہے اور وہ تحریک منظور ہونے کی صورت میں غیر حاضر رکن کی نشست خالی قراردے دی جائے گی، بطور سپیکر ایوان کو آئین اور قواعد سے آگاہ کر رہا ہوں، قواعد و ضوابط ملک عامر ڈوگر کو دی جائیں۔

(جاری ہے)

اس پر تحریک انصاف کے رکن ملک عامر ڈوگر نے کہا کہ ’یہ رول جو آپ نے پڑھا ہے بتا دیں آج تک کس نے قواعد پر عمل کیا ہے؟ ہمارے اراکین یہاں پارلیمنٹ ہاؤس سے گرفتار کیے گئے، یہاں جو ظلم ہو رہا ہے ہمارے اراکین کو جیلوں میں ڈالا جا رہا ہے‘، سپیکر قومی اسمبلی نے جواب دیا کہ ’ہم نے پروڈکشن آرڈر جاری کیے ہیں‘، جس پر ملک عامر ڈوگر نے کہا کہ ’یہ ہمارا حق ہے‘، ایاز صادق نے سوال کیا کہ ’یہ حق 2018ء سے 2022ء تک کہاں تھا؟‘، پی ٹی آئی رکن نے کہا کہ ’یہی ماحول رہنا ہے تو پارلیمان کو تالا لگا دیں‘۔

بتایا گیا ہے کہ سپیکر کی رولنگ کے بعد صدر ینگ پارلیمنٹیرینز فارم و رکن قومی اسمبلی سیدہ نوشین افتخار کی جانب سے پاکستان تحریک انصاف رکن قومی اسمبلی شیخ وقاص اکرم کی قومی اسمبلی کے اجلاسوں سے متواتر 40 دن بغیر درخواست دیئے غیر حاضری پر اسلامی جمہوریہ پاکستان کے آئین کے آرٹیکل نمبر 64 کی شک نمبر 2 کے تحت تحریک پیش کی جس میں شیخ وقاص اکرم کی رکنیت ختم کرنے کا مطالبہ کیا گیا۔