Live Updates

پولیس کی بھاری نفری پارلیمنٹ ہاؤس کے باہر پہنچ گئی، پی ٹی آئی ارکان کی گرفتاری کا امکان

پارلیمنٹ ہاؤس کا مرکزی داخلی دروازہ بند کردیا گیا اور پارلیمنٹ کے باہر سکیورٹی الرٹ کردی گئی، سپیکر قومی اسمبلی سردار ایاز صادق نے پارلیمنٹ ہاؤس کا متبادل گیٹ کھلوا دیا

ساجد علی منگل 5 اگست 2025 14:51

پولیس کی بھاری نفری پارلیمنٹ ہاؤس کے باہر پہنچ گئی، پی ٹی آئی ارکان ..

اسلام آباد ( اُردو پوائنٹ اخبارتازہ ترین۔ 05 اگست 2025ء ) وفاقی دارالحکومت اسلام آباد میں پولیس کی بھاری نفری پارلیمنٹ ہاؤس کے باہر پہنچ گئی۔ اطلاعات کے مطابق پی ٹی آئی کی جانب سے دی جانے والی احتجاج کی کال پر قومی اسمبلی کے اجلاس کے موقع پر پولیس کی بھاری نفری پارلیمنٹ ہاؤس کے باہر موجود ہے جہاں سے پی ٹی آئی ارکان اسمبلی کو گرفتار کیے جانے کا امکان ہے، سپیکر قومی اسمبلی سردار ایاز صادق نے پارلیمنٹ ہاؤس کا متبادل گیٹ کھلوا دیا، پارلیمنٹ ہاؤس کا مرکزی داخلی دروازہ بند کردیا گیا اور پارلیمنٹ کے باہر سکیورٹی الرٹ کردی گئی۔

بتایا گیا ہے کہ صوبہ پنجاب کے دارالحکومت لاہور میں تحریک انصاف کے پیٹرن انچیف عمران خان کی گرفتاری کو دو سال ہونے پر دی گئی احتجاج کی کال پر آج 5 اگست کو پی ٹی آئی کی طرف سے مختلف مقامات پر ریلیاں نکالی گئیں، لاہور میں نکالی جانے والی پی ٹی آئی کی ایک ریلی سے 6 اراکین پنجاب اسمبلی کو گرفتار کرلیا گیا، ان میں پنجاب اسمبلی میں ڈپٹی اپوزیشن لیڈر معین قریشی، ایم پی اے فرخ جاوید مون سمیت 6 اراکین صوبائی اسمبلی شامل ہیں۔

(جاری ہے)

تحریک انصاف کی جانب سے الزام عائد کیا گیا کہ لاہور میں پولیس نے احتجاجی ریلی میں شامل گاڑیوں پر ڈنڈے مار کر شیشے توڑ دیئے، ان میں چیف آرگنائزر پی ٹی آئی پنجاب عالیہ حمزہ ملک کی گاڑی بھی شامل ہے، جاتی عمرہ پائن ایونیو کے قریب پی ٹی آئی کی ریلی کے موقع پر عالیہ حمزہ کی پولیس کے ساتھ مدبھیڑ ہوئی، جس پر مبینہ طور پر پولیس نے ڈنڈے برسائے اور گاڑی کی سکرین توڑ دی، اس دوران عالیہ حمزہ کے زخمی ہونے کی بھی اطلاع موصول ہوئی ہے۔

پی ٹی آئی رہنماء اظہر مشوانی کا کہنا تھا کہ لاہور میں پی ٹی آئی کی احتجاجی ریلی پر پولیس کا کریک ڈاؤن متعدد کارکنان کو گرفتار کرلیا گیا، لاہور سے 300 سے کارکنان کو حراست میں لیے جانے کی اطلاعات ہیں، لاہور پولیس پی ٹی آئی رہنماؤں اور کارکنوں کی گرفتاری کیلئے چھاپے مار رہی ہے۔