�ال سے ڈیوٹیاں سرانجام دینے والی1080کمیونٹی اساتذہ کو فوری مستقل کرکے تنخواہوں میں اضافہ کیا جائے،امین اللہ میانی

اتوار 15 جون 2025 19:25

کوئٹہ(اُردو پوائنٹ اخبارتازہ ترین - این این آئی۔ 15 جون2025ء)بلوچستان کمیونٹی اسکولز ٹیچرز ایسوسی ایشن کے صدر امین اللہ میانی نے کہا ہے کہ 18سال سے قلیل تنخواہوں کے باوجود ڈیوٹیاں سرانجام دینے والی1080کمیونٹی اساتذہ کو فوری طور پرمستقل کرکے انکی تنخواہوں میں اضافہ کیا جائے بصورت دیگر بلوچستان کمیونٹی اسکولز ٹیچر ز ایسوسی ایشن سخت احتجاج پر مجبور ہوگی۔

یہ بات انہوں نے اتوار کو ،شربت رند، ظفراللہ ،مہر اللہ اوردیگر کے ہمراہ کوئٹہ پریس کلب میں پریس کانفرنس کرتے ہوئے کہی۔انہوں نے کہا کہ بلوچستان کمیونٹی اساتذہ 18سال سے قلیل تنخواہوں میں اپنی ڈیوٹیاں سرانجام دے رہے ہیں لیکن اب مہنگائی کے باعث قلیل تنخواہ میں گزارا بہت مشکل ہوچکا ہے ۔انہوں نے کہا کہ ہمارا کوئی سروس اسٹرکچر نہیں ہے اور نہ ہی ہمیں مستقل کیا جارہا ہے جس سے 1080کمیونٹی اساتذہ کا مستقبل خطرے سے دوچار ہے ۔

(جاری ہے)

انہوں نے کہاکہ بلوچستان کمیونٹی اساتذہ کی تنخواہوں میں اضافے کیلئے محکمہ فنانس بلوچستان کو بھیجی گئی سمری مسترد ہوگئی ہے جس کی ہم مذمت کرتے ہیں۔ انہوں نے کہا کہ کمیونٹی اساتذہ کی تنخواہوں میں اضافے کی سمری 2024اور 2025ء میں بھیجی گئی جو دونوں بار ریجیکٹ ہوگئی جو کہ سراسر نا انصافی ہے ۔انہوں نے کہا کہ حکومت 18سال سے کنٹریکٹ پر کام کرنے والے کمیونٹی اساتذہ کو فوری طور پر مستقل کرکے انہیں محکمہ تعلیم کے حووالے کرے اورکمیونٹی اساتذہ کی تنخواہوں میں مناسب اضافہ کیا جائے بصورت دیگر بلوچستان کمیونٹی اسکولز ٹیچرز ایسوسی ایشن سخت احتجاج پر مجبور ہوگی۔