ڈپٹی کمشنر کی زیر صدارت محرم الحرام کے سلسلہ میں ضلعی امن کمیٹی کا اجلاس

پیر 16 جون 2025 13:22

قصور (اُردو پوائنٹ اخبارتازہ ترین - اے پی پی۔ 16 جون2025ء) ڈپٹی کمشنر عمران علی کی زیر صدارت محرم الحرام کے سلسلہ میں ضلعی امن کمیٹی کا اجلاس ڈی سی کمیٹی روم میں منعقد ہوا۔ اجلاس میں اے ڈی سی جنرل سلمون ایوب دیگر ضلعی افسران سمیت ضلعی امن کمیٹی کے ممبران نے شرکت کی۔ اجلاس میں ممبران کمیٹی نے اپنی اپنی تجاویز پیش کیں اور ملک میں امن و امان کی فضا قائم رکھنے کی یقینی دہانی کروائی۔

اجلاس سے خطاب کرتے ہوئے ڈی سی عمران علی نے کہاکہ ضلعی امن کمیٹی کے اجلاس کا مقصد ضلع بھر امن و امان کی فضا کو برقرار رکھنے کے عزم کا اعادہ کرنا ہے ۔ عشرہ محرم الحرام کے دوران بہترین اور فول پروف انتظامات ضلعی انتظامیہ کی اولین ترجیح ہے ۔ تمام مذاہب ومسالک کے لوگوں کو چاہیے کہ وہ ایک دوسرے سے بڑھ چڑھ کر اپنا اپنا کردار ادا کریں۔

(جاری ہے)

امام بارگاہوں ، مدرسوں اور مذہبی عبادت گاہوں میں سیکورٹی ، صفائی ستھرائی و دیگر انتظامات ضلعی انتظامیہ کی ذمہ داری ہے ۔

مجالس کے مقامات اور جلوسوں کے راستوں کے تحفظ کو یقینی بنانے کے لیے بہترین اور فول پروف انتظامات کیے جائیں گے ۔قصور امن اور بھائی چارے کا گہوارہ ہے ، ہمیں اسی روایت کو برقرار رکھتے ہوئے امن اور بھائی چارے کے لیے اپنا اپنا کردار ادا کرنا ہے ۔ضلعی اور تحصیل کی سطح پر کنٹرول روم قائم کیے جائیں گے ۔ڈی سی کا مزید کہنا تھا کہ ضلع بھر میں حفاظتی و انتظامی امور کے استحکام کیلئے تمام مکاتب فکر کے علماء کرام و مذہبی راہنماؤں کی مشاورت کو مقدم رکھا جاتا ہے ، جس سے امن و سلامتی کی ضمانت ملتی ہے۔

علماء کرام اپنے محراب و ممبر سے مذہبی رواداری ، پیار و محبت اور قانون کی پاسداری کا درس جاری رکھیں۔ محرم الحرام کے موقع پر جامع سیکورٹی پلان کے تحت تمام امام بارگاہوں کے باہر پولیس کے جوان تعینات ہونگے۔ امام بارگاہوں کے داخلی و خارجی راستوں پر واک تھرو گیٹ نصب کیے جائیں گے ۔تمام چھوٹے بڑے جلوسوں کے روٹس اور مجالس کی سی سی ٹی وی کیمروں سے مانیٹرنگ کی جائے گی ۔ضلع بھر میں امن و امان اور عوام کے جان ومال کا تحفظ ضلعی انتظامیہ اور پولیس کی اولین ترجیح ہے ۔امن کمیٹی کے اجلاس کے اختتام پر ملک و قوم کی سلامتی کے لیے خصوصی دعا بھی کی گئی۔\378