Live Updates

محکمہ تعلیم سندھ کے ریٹائرڈ اساتذہ کے مسائل حل نہ ہو سکے

پنشن میں 100 فیصد اضافہ نہ ہونے، گروپ انشورنس اور بینویلینٹ فنڈز تاخیر کے خلاف گرٹا نے وزیر اعلی ہائوس پر دھرنے کی دھمکی دے دی

پیر 16 جون 2025 21:30

حیدرآباد(اُردو پوائنٹ اخبارتازہ ترین - این این آئی۔ 16 جون2025ء) محکمہ تعلیم سندھ کے ریٹائرڈ اساتذہ کے مسائل حل نہ ہو سکے، پنشن میں 100 فیصد اضافہ نہ ہونے، گروپ انشورنس اور بینویلینٹ فنڈز تاخیر کے خلاف گرٹا نے وزیر اعلی ہائوس پر دھرنے کی دھمکی دے دی۔گورنمنٹ ریٹائرڈ ٹیچرز ایسوسی ایشن حیدرآباد نے اپنے مطالبات کے حق میں نیول رائے ہائی اسکول میں احتجاجی مظاہرہ کیا۔

مظاہرے سے قبل ایسوسی ایشن کا اجلاس سندھ کے مرکزی صدر ضمیر خان کی زیر صدارت ہوا۔ اجلاس میں مبارک عباسی، محمد حنیف، نگہت عباسی، اعجاز مصطفی اور دیگر نے شرکت کی۔رہنماں نے کہا کہ یہ انتہائی افسوسناک ہے کہ مہنگائی کے اس دور میں ریٹائرڈ اساتذہ کی پنشن میں 100 فیصد اضافے کے بجائے 8 فیصد کا معمولی اضافہ کیا گیا ہے۔

(جاری ہے)

جبکہ ریٹائرڈ ملازمین گروپ انشورنس اور پنشن کے فوائد سے محروم ہیں، ان کا کہنا تھا کہ دوسرے صوبوں میں ملازمین کو گروپ انشورنس کی ادائیگی کی جا رہی ہے، لیکن سندھ کے ریٹائرڈ ملازمین محروم ہیں۔

ان کا کہنا تھا کہ گروپ انشورنس اور پراویڈنٹ فنڈز کے لیے ملازمین کی تنخواہوں سے کٹوتی کی جاتی ہے لیکن اس کے باوجود ریٹائرڈ ملازمین کو ان رقوم سے محروم کر کے ان کے حقوق سے محروم رکھا جا رہا ہے۔ انہوں نے انتباہ کیا کہ اگر رواں ماہ کے آخر تک ان کے مطالبات تسلیم نہ کیے گئے تو وہ جلد کراچی میں وزیر اعلی ہاس پر دھرنا دیں گے، جو ان کے مطالبات کی منظوری تک جاری رہے گا۔