Live Updates

میزائل اور ڈرون حملوں میں تیزی آگئی، ایران کا تل ابیب میں موساد ہیڈ کوارٹر پر حملے کا دعویٰ

حملوں میں اسرائیل میں موجود ملٹری انٹیلی جنس سینٹر اور موساد کے آپریشنز پلاننگ سینٹر کو نشانہ بنایا گیا

ساجد علی منگل 17 جون 2025 15:37

میزائل اور ڈرون حملوں میں تیزی آگئی، ایران کا تل ابیب میں موساد ہیڈ ..

تل ابیب ( اُردو پوائنٹ اخبارتازہ ترین۔ 17 جون 2025ء ) ایران نے اسرائیلی شہر تل ابیب میں موساد ہیڈ کوارٹر پر حملے کا دعویٰ کردیا۔ ایرانی سرکاری ٹی وی پر ایرانی پاسداران انقلاب کی جانب سے جاری بیان میں کہا گیا ہے کہ اسرائیل کے حساس فوجی اور انٹیلی جنس مراکز پر براہِ راست حملے کیے ہیں، ان حملوں میں اسرائیل میں موجود ملٹری انٹیلی جنس سینٹر اور موساد کے آپریشنز پلاننگ سینٹر کو نشانہ بنایا گیا۔

اس حوالے سے روسی میڈیا کا کہنا ہے کہ ایران نے اپنے میزائل حملے میں ہرزیلیہ میں موساد اور یونٹ 8200 کی عمارت کو نشانہ بنایا، اس کے علاوہ گیلوٹ میں انٹیلی جنس مرکز کے لاجسٹک سینٹر بھی اس حملے کا نشانہ بنے۔ بتایا گیا ہے کہ پاسداران انقلاب نے اسرائیل کی جانب ایک اور طاقتور میزائل حملے کی تصدیق کی ہے، تل ابیب اور یروشلم میں دھماکوں کی آوازیں سنائی دیں، ایرانی ڈرونز نے اسرائیل میں اسٹریٹیجک اہداف کو کامیابی سے نشانہ بنایا، مختلف اقسام کے تباہ کن ڈرونز کی مدد تل ابیب اور حیفا میں اہم تنصیبات کو نشانہ بنایا گیا، ایرانی خبر رساں ایجنسی نے ایک اعلیٰ ایرانی کمانڈر کے حوالے سے بتایا کہ آنے والے گھنٹوں میں ایران کی طرف سے حملوں میں مزید شدت آجائے گی۔

(جاری ہے)

اسرائیلی پولیس کا کہنا ہے کہ تل ابیب کے علاقے میں گرنے والے میزائلوں اور ان کے ٹکڑوں سے مالی نقصان ہوا تاہم کسی جانی نقصان کی اطلاع نہیں ملی، بم ڈسپوزل یونٹ اور سکیورٹی فورسز علاقے کو محفوظ بنانے میں مصروف ہیں، اس کے علاوہ دان علاقے کے قریب بھی ایک شہر میں میزائل گرنے کے بعد وہاں آگ لگنے کی اطلاع ملی ہے، گوش دان میں بھی ایسی ہی اطلاعات سامنے آئی ہیں، ایران کی طرف سے داغے گئے درجنوں میزائلوں کی نشاندہی ہوئی، دفاعی نظام انہیں روکنے کی کوشش کر رہا ہے، ایران سے داغے جانے والے میزائلوں کے جواب میں اسرائیلی فضائیہ نے 30 سے زائد ایرانی ڈرونز کو تباہ کیا۔