بجٹ میں محکمہ صحت کیلئے 2120کنٹریکٹ اور37ریگولر نئی اسامیاں تخلیق کی گئی ہیں،صوبائی وزیر خزانہ

کوئٹہ (اُردو پوائنٹ اخبارتازہ ترین - اے پی پی۔ 17 جون2025ء) صوبائی وزیر خزانہ میرشعیب نوشیروانی نے کہا ہے کہ مالی سال2025-26 کے بجٹ میں محکمہ صحت کیلئے 2120کنٹریکٹ اور37ریگولر نئی آسامیاں تخلیق کی گئی ہیں۔ ان خیالات کا اظہار انہوں نے منگل کو بلوچستان اسمبلی میں آئندہ مالی سال کا بجٹ پیش کرتے ہوئے کیا۔ وزیر خزانہ میر شغیب نوشیروانی نے کہاکہ صحت کی بہتر سہولیات کی فراہمی حکومت کی اولین ترجیح ہے۔

صحت کا بہتر نظام نہ صرف لوگوں کے معیار ِزندگی کو بہتر بناتا ہے بلکہ معاشی ترقی میں بھی معاؤن ثابت ہو تا ہے۔ مختلف بیماریوں کی روک تھا م، علاج معالجہ اور فروغ صحت کے حوالے سے اِقدامات کرنا، پبلک سیکٹر میں اِنتہائی اہمیت کے حامل ہے اِسی لیے شعبہ صحت ہماری حکومت کی اولین ترجیحات میں شا مل ہے۔

(جاری ہے)

محکمہ صحت نے ریکارڈ مدت میں بلوچستان ہیلتھ کارڈ پروگرام کا آغاز کیاتھااورمزید اِس پروگرام کو وسعت دِیاجارہا ہے۔

اِس اِنقلابی اِقدام سے صوبے کے شہریوں کو صحت کی سہولیات کی فراہمی میں آسانیاں پیدا ہوئیں ہیں۔لورالائی اور خضدار میں برن یونٹس کا قیام اور اِن کی مشینری و دیگر ضروری آلات کی فراہمی اور کوئٹہ میں نئے قائم شدہ کینسر ہسپتال و ٹراما سینٹرکوسہولیات مہیا کرنا حکومتی اِقدامات میں شامل ہیں۔ضلع نصیر آباد اور ژوب کے ڈسٹرکٹ ہیڈ کوارٹرز ہسپتالوں میں 20بستروں پر مشتمل مکمل طور پر آئی سی یو اور ایچ ڈی یو سے لیس ہسپتال کا قیام عمل میں لایا گیا ہے۔

اِسی طرح رواں مالی سال میں بلوچستان کے تمام اِضلاع کے لئے مجموعی طور پر 66ایمبولینسیز کی خریداری کی گئی ہیں۔رواں مالی سال کے دوران663میڈیکل آفیسرز، لیڈی میڈیکل آفیسرز، ڈینٹل سرجنز اور اِسٹاف نرسز کوکنٹریکٹ بنیادوں پر بھرتی کیے جا چکے ہیں۔ اب تک ہماری صوبائی حکومت بلوچستان ہیلتھ کارڈ پروگرام کے تحت تقریبا 208,986مریضوں کو 6300ملین روپے کی لاگت سے مفت علاج و ادویات فراہم کر چکی ہے اور دور دراز علاقوں میں عام آدمی کو صحت کی سہولیات کی فراہمی کے لئے پی پی ایچ آئی کو4600ملین روپے کے گرانٹ دے چکا ہے۔

آنے والی مالی سال 2025-26میں شعبہ صحت کے لیے2120کنٹریکٹ اور 37ریگولرنئی آسامیاں تخلیق کی گئی ہیں۔ مجموعی طورپر مالی سال 2025-26میں محکم صحت کے ترقیاتی بجٹ کی مد میں 16.4اور غیر ترقیاتی مد میں 71ارب روپے مختص کیے گئے ہیں۔